LADC a CEM hovin Green LADC Day 2024 ah, LADC hnuaia Department hrang hrang ten thing tiak an phun.

Kum 2015 atanga kumtina hman thin, Ramngaw humhalh leh Thingphun a pawimawhzia inzirtirna atan a Lai Autonomous District in Green LADC Day a hman thin chu vawiin khan Chief Executive Member Pu C.Lalmuanthanga hovin hman a ni.

Green LADC Day 2024 puala inkhawm tawi, LADC Office Complex a buatsaih ah CEM Pu C.Lalmuanthanga chuan ramngaw leh nungcha humhalh a, venhim chu ram danpuiin khua leh tuitte tihtura a dah a ni a, kan damkhawchhuah nan kan tih ngei ngei a ngai tih sawiin, kan khawvel rawn luahzuitur kan tu leh fate tan khawvel nuam siamturin Thingphun a enkawlzui chu kan tih makmawh a ni a ti.

Vawiin Green LADC Day ah hian, khaw chhe hnuaiah Kaladan Multi Modal Transit Transport Project kawngpui kam ah thingtiak 327 phunin thataka hung a ni a, LADC hnuaia Department hrang hrang bakah MJA Lawngtlai District ten thing tiak hi an phun a, Department te hi anmahni enkawltu Executive Member ten an hova, Green LADC hmantan kum 2015 atangin thingtiak 3,099 phunnun a enkawl mek a ni.

Green LADC Day ah hian thing chi hrang hrang phun thin a ni a, Thlado, Lenhmui, April par, Khuangthli, Herhse, Tespata, Ngiau, Char leh a dangte phun a ni tlangpui thin.