DC hi Lawngtlai District Superintendent of Police Pu R. Lokeshwaran, Election Officer Pu Denny Lalchhuanawma, Lawngtlai Block Development Officer Pu Collin Hlychho, DIPRO Pu C. Lalhruaitluanga leh chanchinbu mite'n an ṭawiawm a. Village Council leh tlawmngai pawl hruaitute nen thli leh rialin chenna in a tihchhiatte chu a hmunah tlawhin, thawm ṭhat dan tur ruahmannate an sawi ho va. Bawrhsap chuan thli leh rialin chenna in a tihchhiatte chu sawrkar aṭanga chhawmdawlna leh ṭanpuina awm thei angte ngaihtuahsak an nih tur thu a sawi a. Rialin an in chung rangva a den chhiatte hnenah a nih tur anga ṭanpuina pek theih hmaa an lo khuh lailawk nan silpauline a hlan nghal bawk a ni.
Hriat theih chinah May ni 2, 2024-a thli leh rialin chenna in a tihchhiat hi Lawngtlai District-ah 209 awmin, chu'ng zinga 62 chu raltlante chenna in/buk a ni a. Khaw malkhaia in chhia tamna ber chu Tuithumhnar niin, chenna in 76 (raltlan in 18 telin) a chhia a. Chamdur P-I-ah in 25, Vawmbuk-II-ah in 24, Vaṭhuampuiah raltlan chenna in 21, Hmawngbu-ah in 12, Lunghaukaah in 10 leh khaw dang pariatah belh khawmin in 41 a chhe bawk.
Lawngtlai District Disaster Management Authority (DDMA) aṭangin thli leh rial vanga chenna in chhiat dan hi DM&R Department-ah preliminary report thawn tawh a ni a. A chhiat dan dinhmun kimchang nen report thawn leh tur niin, a in chhiat dan azirin sawrkar aṭangin chhawmdawlna leh ṭanpuina hi pek tura ruahman a ni.
Lawngtlai DDMA chuan fur laia ruah, thli, rial, ṭek leh leimin awm thei lakah fimkhur tur te, chhiatna thleng thei pumpelh a nih theih nana inhmakhua lawk tur te leh chhiatna thlen thulhah pawh thuneitute hnenah hriattir vat ṭhin tur te'n District mipuite a chah a ni.
Lawngtlai DC,Pu Cheemala Siva Gopal Reddy hian India leh Myanmar inrinna, Zorinpui pawh tlawhin, Assam Rifle hotuten lo dawngsawngin, ramri a dan leh thupek kenkawh a nihdante, ramri a khawtual mite dinhmunte an sawidun a, khawtualmi thenkhat pawh DC hian kawmin Zorinpui ah thenawm ram nen innekbuaina leh thil duhawmlo thleng a awm ngailo tih khawtual mite chuan Lawngtlai DC hi an hrilh.