Vawin khan Lawngtlai District a tlawmngai pawl lian ber YLA kum 50 tlinna Golden Jubilee kumin 2024 chhunga lawmna neih tur hawnna inkhawm Areopagy, Bazar Veng Lawngtlai ah neih ani.
Central YLA President Pu HC.Vanlalruatpuia chuan Kumin 2024 chhunga YLA Golden Jubilee lawmna a hawng a, Central YLA President lo ni tawh Pu H.Zothangliana chuan Aia Upa zah chu YLA member ten chawi nung thar leh ila a duh thu sawiin, Zirna kawngah tun aia nasa zawk a thalaite ke pen tura chahin, Ramngaw leh Lui leh nungchate chu humhalh an ngai takzet tawh tih a sawi a, hemi atana YLA Member zawng zawngte thahnemngai turin a sawm bawk. Pu Zothangliana chuan LADC Sawrkar chungchang sawilangin, LADC hlutna leh humhim hi kan ram leilung fate hian kan tihtur a ni tih i hria ang u tiin, tuna YLA Memberte hi nakin lawka kan ram hruaitu turte in nih avangin, kaihhruai tlak ram din turin tan kan lak angai a, Rorelna fel leh midangte Rorelna tha hnutchhiah turin tuna thuneitute pawh ka ngen bawk ani ati.
He hunah hian Central YLA Hruaitu lo ni tawh te thahnem tak an tel thei a, Branch hrang hrang atangin Items thlir leh ngaihthlak ani bawk.
Pu Joseph Lalhmingthanga Chinzah, General Secretary chuan report pe in, YLA chu kum 1974. September ni 23 a din anih thu te, tun dinhmunah YLA chuan Sub-Hqrs 7 leh Branch 116 nei mekin, YLA Member hi 55760 an awm mek thu a tarlang bawk.
YLA Golden Jubilee hi kumin kum tluana lawm tum a ni a, May thla chawhnu lam atangin Inter Branch Football Tournament neih a ni dawn a. October thla ah Branch Zaipawl leh Hnam lam intihsiakna neih a ni ang a, September ni 23 ah Branch zawng zawngin Jubilee lawmna neih tur a ruahman niin, November thla ah hian Ni 3 chhung Jubilee lawmna puiber Lawngtlai ah neih tum a ni.