Lairam Isua Krista Baptist Kohhran - Bazar Pastor Bial Ṭhalai Pawl te chuan vawiin khan Bial Thalai Pawl thurel bawhzuiin, Chhimtuipui, Tuipui Ferry ah Vantlang tana thiltha tihna hun hmangin Tuipui Ferry leh a chhehvel, Chhimtuipui kama bawlhhlawh tihfaiin an hnatlang.
Hnatlang tana hma a hunserh an hman chu Lawngtlai Bazar Bial Thalai Pawl Vice Chairman, Rbt. Lalramengzaua'n kaihruaiin, Adviser Upa F. Chanliana a tawngtai a, Bial hnatlangah hian Centre Church Unit, Council Veng Unit leh Dinthar Unit atangin ṭhalai member mi 52 an thawkchhuak.
He hunah hian Central Environment Protection Committee atangin Chairman-Rbt. Benjamin Ramdinsanga leh Secretary Kanantharmawia ten an telpui a, fuihna thu sawiin vawiin ni a ṭhalaite hian chhuan lo awm lehzel turte tana Environment humhalh a pawimawh thu sawiin, lui tui leh lui hnar te tihfai a pawimawh thu leh vawiin ni a thalaite hi a tibawlhhlawhtu ni lova, a tifaitu leh a humhalhtu, Environment humhalhna kawnga midangte kaihruaitu an nih a pawimawh thu an sawi.
Hnatlanga chhuakte hian Chimtuipui kama bawlhhlawh chharfaiin midang tan hnawksakloturin an tiral nghal a, Chhimtuipui, Tuipui Ferry hi Lawngtlai atanga pannuam, insuk, inbual leh hunawl hnawhkhah nan a hman nasat a nih vangin, helai tlawhtuten bawlhhlawh an hnutchhiah hi a tam tham thin hle a, heng bawlhhlawhte hi vawiin a hnatlanga chhuakte hian a theih ang ang an thianfai a, helai hmun tlawhtute chu bawlhhlawh siamlo zawnga khawsa tur leh bawlhhlawh hnutchhiah mai lova, hnawksak lo tura tiral thin turin an ngen a, hnatlang an neih zawh hian Adviser Upa Laibikliana'n hnatlang tawpna ṭawngṭaina hun a hmang.