District Headquarters Lawngtlai
Lawngtlai : Mizoram
Press Release
No.15/2024
"LADC rorelna kal tluang lai nam tluk a ni leh, Suspend hial a ngai ta mai hi MNF District Headquarter Lawngtlai chuan pawi a tiin, hnam ang zawng pawha mualphona namen lovah kan ngai."
Lawngtlai, March 23rd, 2024
No.MNF/29/LD/PR/2024
Lawngtlai, March 23rd, 2024: Lai Autonomous District Council a rorel lai MNF-MDC te chuan, Mizorama ZPM a Sorkar tirhin Chief Minister zahawm tak, Pu Lalduhoma chu a Pisa ah lengin, District Council tana thil pawimawh hrang hrang sawipuiin lawmpuina hun an hmang a. Hetih huna MNF MDC te leh Chief Minister-ten inkawmna hun an neih lai hian Chief Minister, Pu Lalduhawma chuan, _Autonomous District Council chu mahnia ro inrel hran an nih avangin tluang taka Sorkarna kalpui zel se a duh thu sawiin; hun kal tawha State Sorkar inthlak apianga District Council sâwi danglam a ni ziah ṭhinte chu pawi a tih thu te, inpawh tlang taka ADC te nen thawhhona ṭha tak neia hmalak dun zel a duh thu te leh, ZPM Sorkar, Kalphung tharah chuan engmah ADC tana a ṭha lo zawnga hmalakna leh hnathawh a awm dawn loh thu,_ MNF MDC te hi a lo hrilh hlawm a ni.
Chutih mek laia Budget Session pawimawh tak pawh tel ṭha ṭhum hman lo leka Lawngtlai East MLA, Dr. Lorrain Lalpekliana Chinzah, Adviser to CM leh ZPM MDC, Pu K. Hrekung te'n LADC a MNF rorelna paihthlak a nih theih nana theih tawp chhuaha hma an la ta mai leh, MDC Ticket leh Contract Work hmangtea MDC ṭhenkhatte an thlem kual ta mai hi hriatthiam har kan ti a, a pawi kan ti takzet bawk a ni.
Hetianga Chief Minister berin ADC chungchanga thu tawp siama ngaihdan nghet tak a neih mek lai a, Chief Minister duhdan leh ngaihdan kalh zawng leh dodal zawnga kan Lai pate ngei mai, Lawngtlai East MLA leh ZPM MDC ten chet an la ta mai hi a pawi kan tiin, hriatthiam har kan ti takzet a; ZPM Party tih mualphona lian takah kan ngai tlat a ni. Kalphung thar Sorkarah hian inlungrualna tak tak hi a awm ta lo nge, tih leh hetianga ram hluizia bawk rawn thar thawh nawn leh hi Kalphung thar zia dik tak zawk em ni? Tih hi kan zawhna lian tak a ni reng bawk.
Lalna leh thu neihna duh luat avanga Chungu nung chung buk tia mite'n min lo hmel hriat tawh ṭhin dan leh kan lo thang tlawm tawh ṭhinna bawk rawn chhawm nung leh tuma hma an la hi ram leh hnam ang zawng pawha mualphona lian tak a nih avangin, tun hnuah chuan an ke pen fimkhur tawh turin Lawngtlai East MLA leh ZPM MDC te hi kan ngen nghal a ni.
Chutih mek lai a, thlemna leh therhlo chi tin reng hmang pawha thlem thluk theih loh mi rinawm leh, kan ram rorelna sang ber zahawmna vawn nun duh tlattu MDC kan nei hi lawmawm kan ti hle a, kan chhuang tak zet bawk a ni. Miten 'Chungu nung chung buk' tia min sawi ṭhinna paih bo tura ke an penna leh Zawngte Satel khalh ang mai a, State Sorkar-in District Council a duh hun huna a kuai thal tur danga veng tlattu kan MDC te hi a tawp thlengin MNF District Headquarter Lawngtlai chuan a thawhpuiin, a venpui tlat dawn a ni tih Lairam mipuite'n lo hria se ka duh bawk a ni.
Tin, kan MDC ṭhenkhat tun dinhmuna ngaihdan hrang neite pawh an dinhmun kan hriatthiampui em em a, ngun taka inngaihtuah nawn a, Ram leh hnam zahawmna vawng nung tur leh Pathian leh kan Ram tan tia theih tawp chhuaha lungrual taka ke penho leh dial dial turin kan insawm thar leh nghal bawk a ni e.
Issued by: Info. & Publicity Committee, MNF District Headquaters Lawngtlai