ZPM Lai Distric Headquaters thuchhuahin a tarlan danin vawiin khan Lawngtlai East MLA Dr. Lorrain Lalpekliana Chinzah chuan Lawngtlai bul Chawnhu khuaa sawrkar hmalakna leh hmasawnna hnathawh mekte tlawhin, hnathawh dan leh ruahmanna awm mekte a hmunah a en fiah.
Lawngtlai East MLA hian 33kV sub-station aṭanga 132kV power sub-station a hlankai tur leh tih changtlung tura hnathawh mek chu tlawhin, Mizoram chhim lam chawmtu power sub-station pawimawh tak a nih avangin hnathawktu te chu thahnemngai taka thawk turin a chah a. MLA hi P&E Lawngtlai Division EE Pu Ramdinsanga leh staff te'n an lo dawngsawng a, thil pawimawh leh ṭulte MLA hnenah hian an lo thlen bawk a ni.
Adviser to Chief Minister (Agriculture) ni bawk Dr. Lorrain Lalpekliana Chinzah chuan KVK Office Chawnhu tlawh bawkin ; Dr. C. Lalfakawma, Sr. Scientist & Head of Department chuan a lo dawngsawng a. KVK hmalakna, thil tum leh hnathawh mekte Adviser to CM hnenah hian a lo hrilhfiah a ni.
PMJVK leh Central scheme hmanga sawrkar hmasa hmalakna pawh Lawngtlai East MLA hian tlawh nghal bawkin, sports infrastructure chi hrang hrang ; Volleyball court, Basketball court leh Indoor stadium sak mekte chu a hmunah a enfiah a. Assembly Session neih zawh tâka zawhna leh chhanna aṭanga thil felhlel awm ni ngeia lang Chawnhu field laih mek pawh a hmunah tlawhin a enfiah a. Branch YLA hruaitute nen inkawmhona hun ṭha tak an nei zui bawk a ni.
Adviser to Chief Minister Dr. Lorrain Lalpekliana Chinzah hi Chawnhu khawtlang hruaitute'n lo dawngsawngin, a hun awl neih hmasak berah Chawnhu khawtlang a tlawh chu láwmawm an tih thu an sawi a ni.