He thu hi vawiina Lawngtlai khaw chhunga zirna in hrang hrang te tlawhnah a sawi a. Tun hnaia Mizoram Sorkar kaltlanga Samagra Shiksha zirtirtu 161 lakna turah pawh Written Exam bakah an thiamnate a tak a an hman chhuah thiam leh thiam loh endik nan ‘Demo-Teaching’ neih tura ruahman a nih thu a sawi.
Education Minister Dr. Vanlalthlana chuan, sorkar hna lak chungchangah khawi hmun atang pawha duhsakna lan tir tur a lehkha ziak a awm a nih pawhin awmzia a awm loh tur thu a sawi a, tuna sorkar hna lak chungchang a kalphung thar hmanna chu nakin zela mi taima, tumruh, a thiam leh phu te chauhin hlawhtlinna an chan theih nana kawng sial lawkna a nih thu a sawi.
Education Minister chuan Lawngtlai a District Institute of Educational Research and Training a tlawhnaah thusawiin DIET chu zirtirtu turte zirtir chhawn lehna hmun pawimawh tak a nih angin thiamna tak tak an zirtir chhuah ngeina turin leh dikna dinpui ngam tura huaisenna an zir chhuahna hmun a hmang turin zirlaite leh zirtirtute chu a chah a. Ram leh hnam hmangaihtu ni turin leh hmasawnna kawng a kaihruaitu ni thei tura ngaihtuahna hman a pawimawh thu leh thil dik lo tidiktu ni ngam turin zirlaite a fuih bawk a ni.