Vawiin chhun khan DC Conference Hall, Lawngtlaiah Dr. Lorrain Lalpekliana Chinzah, Adviser to Chief Minister, Lawngtlai East bialtu MLA chuan Lawngtlai district chhung a Sawrkar Office hrang hranga hotute a kawm a. Sawrkar langtlang siamna kawng ah leh eirukna leh hlemhletna dona kawng ah kalkhawmte chu thawhpui ah a sawm .
Adviser to Chief Minister Dr. Lorrain Lalpekliana Chinzah chuan Lawngtlai district chu Sawrkar ang a inrelbawlna ṭhuang hnih a kal a nih angin hmasawnna hna chu ṭanrualna boruak ṭha tak hnuai ah kalpui a pawimawh thu a sawi a. Mipui hriselna , Zirna leh Agriculture tihhmasawnna tur a hmalak chu ngaih pawimawh zual a nih tur thu a sawi.
Adviser to CM chuan sawrkar thar kalpuina kawng ah hmasawnna sawt leh awmze nei zawk a kalpui a nih theih nan Office hrang hranga hotute chu finchhuahtu leh thurawn petu ni zel tur a sawmin office inrelbawlna kawng a harsatna an neih te chu ama hnen a thlen ṭhin turin a chah a. Hmasawnna hna hmachhawp awm mekte leh Office hrang hranga thawktute dinhmun chu DC office kaltlangin ziak a thehlut turin a hrilh bawk.
Thutkhawmna hi Pu Abraham Beirazi Khithie, Addl. DC in kaihruaiin Lawngtlai district chhung a Office hrang hrang hotute leh thutharlakhawmtute an tel.