ZPM sorkarah Autonomous District Council te duhsak kan ni dawn. " Adviser to Chief Minister, Dr. Lorrain Lalpekliana Chinzah chuan a ti.

ZPM sorkarah Autonomous District Council te duhsak kan ni dawn." Adviser to Chief Minister, Dr. Lorrain Lalpekliana Chinzah chuan a ti.

 

ZPM thuchhuahin a tarlan danin, Lawngtlai East MLA Dr. Lorrain Lalpekliana Chinzah, Adviser to Chief Minister chuan nimin tlai khan    Lawngtlai thlengin, ZPM Lai District Hqtrs hruaitute leh Lawngtlai khawpui chhunga ZPM Unit hrang hrangte'n an lo hmuak a. Adviser to Chief Minister chuan "Bial mipuite leh Lairam mipuite beisei ang chang lo mah ila, tuna kan hotute min dahna ah hian ka lawm em em a. Pu Lalduhoma kaihhruai ZPM sawrkarna hnuaiah hian Autonomous District Council te duhsak kan ni dawn a, hei hian ka lawmna a ti zual em em a ni" a ti.

Lawngtlai East bialtu MLA chuan, ZPM sawrkarna hnuaiah chuan ni reilo te chhungin kan intiamna tih hlawhtlin a ni tan nghal a ; kut hnathawktute tana Rs. 110 Crores dah a han ni nghalte leh, budget thar atan thlai thar leina tur Rs. 150 Crores Council of Ministers in an han pawmpui nghalte, Zoram mipui tam tak manganna ni thin Healthcare bill ba rulhnan Rs. 40 crores dah a han ni nghalte hi a lawmawm em em a, Kalphung thar, Mipui Sawrkar dik tak kan hmu chho zel dawn a ni, a ti.

Dr. Lorrain-a chuan tun dinhmun a thlen theihnana theihtawp chhuahpui tu ZPM Lai Dist. Hqtrs Lawngtlai hruaitute leh, Block leh Unit hruaitu zawng zawngte chungah lawmthu a sawi a, Lawngtlai East mipuite vanga MLA a tling thei a nih thu sawiin,  thahnemngai taka atana tawngtai thintute leh, amah khawngaih tute avang chauha tun dinhmun thleng thei a nih thu a sawi bawk.

MLA hmuahna programme tawi hi a chenna In Lawngtlai Chandmari vengah neih a ni a. ZPM Lai Dist Hqtrs President Pu MC. Lalramchhana chuan  kaihruaiin, ZPM Lai District Hqtrs Lawngtlai, Zonu, Ṭhalai leh Unit hrang hrangte aiawh ten MLA hnenah hian lawmpuina thilpek an hlan.