Kum 2018-a Chakma Autonomous District Council sum tihchingpen thubuai ah khatih hunlaia CADC CEM leh Executive Member, mi pariat thiam loh chantir an ni.
Aizawl District Court Special Judge (Prevention of Corruption Act) Dr. HTC Lalrinchhana chuan vawiin khan Court thutlukna hi a puang a, Court tarlan danin, kum 2003, February ni 14-a CADC MDC atanga ban, Buddha Lila Chakma in amah banna High Court-a a khing let hnuin, High Court chuan a banna hi kum 2008 May ni 5 khan hnawl sakin dan anga MDC-a a hlawh leh hlam te pe leh turin thupek a chhuah.
Hetihlai hian kum 2018 June ni 1 khan CADC CEM leh Executive member dang 8 te chuan, Buddha Lila Chakma an dan anga a hlawh leh hlam bak ah cheng nuai 49, sing 3, 1420/- dang pek chuan chu inthurual takin an rel thlu a, pek a ni zui ta tih a tarlang a, ACB te hnuchhuina atanga tarlan a nih danin Buddha Lila Chakma hian CADC dan anga a dawn theih chu cheng nuai 14, 03,494 a nih lai in a vaia pawisa an pek chu cheng nuai 63, sing 3, 4914 a nih thu a tarlang bawk a ni.
Court in thiam loh a chantir te hi hetih hunlai-a CADC a Chief Executive Member (CEM) Shanti Jiban Chakma leh Executive Member dang, Hiranand Tongchangya, Sanjeev Chakma, Kusum Lota Chakma, Onish Moy Chakma, Buban Kumar Chakma, Mohan Chakma leh Anil Kanti Chakma te an ni a, hetih lai hian hemi thubuai-a sum dawngtu ber Budha Lila Chakma chu kumin October ni 10 khan a thih avangin a thubuai tih tawp a ni thung a, hremna hi Court chuan naktuk chhun dar 12 ah a puang dawn a ni.