Editorial || SORKAR THAR KAN DAWNSAWN DAN HI.

Democracy rama thil langchiangtak chu, mahni awmna Party an chakloh chuan, Sorkar thar chu pawnlamah theihtawpa puih inhuam anga lana, an chhiattheihna tur kawng dap char char hi eptu lam te hnapuiber a ni.

Mizoram ah ZPM Sorkar thar a pianga, a engahmah hmain, an chuti an khati ang lo tihsek hi Voters ten Sorkar thar an hmachhawn dantur niin a lang lova, an kaldan nguntaka thlirin, a paihtheitu chu mipui kan ni tih inhriatchian a tul a, Political Party ruihchilh leh atchilh tlatna hian ram hmasawnna hi a dal ve nalai hi a awm thui viau in a rinawm.

ZPM an ni emaw, MNF emaw, INC leh BJP pawhnise, tute pawn thuneihna changse, an kaldan en lova, an kaldantura a eng zawnga thil thlirpui lova, a thimlam ngawt lo melhsak hi mipangngai zia a nilova, khalhngil an tul pawha khalhngil tumtu nih zawk hi mipuiin Sorkar an hmachhawn dan tur niin a hriat a, hetiang zawnga mipui rilru a inherremloh chuan Sorkar tha neih maite pawh hi a harru fu maithei.

Mipuiin Sorkar an thlawp tlata, Sorkar lamin mipui thlawpna hmutheitur khawpa hma a lak phawt chuan eng Party pawn Sorkarna siamse, ramin a thatpui ngei ngei ang tih a chiang a, Sorkar thar hian kalphungthar mipuiah a zuara, kalpui theiturin mipuiin thiltitheiah an dah tawh a, an kaldan enphawt ila, a kum thumna chhovel atangin emaw auchhuahpuitur hi a chhelam emaw a thalamah emaw a tam viau tur ah ngai ila, tun hi auchhuah hun a la ni chiah awm love.