Tunkar khan khan Central YLA hruaitute leh BRTF 74 RCC hotute chuan India Defence Road sialna tur, Saisihchhuah leh a chheh vel a kawngpuiin a tan tlang tur khua leh hmun hmate an en ho.
Central YLA hruaitute hi Vice President Pu F. Lalrothanga'n hoin, BRTF 74 RCC hotute bakah Pangkhua Village Council leh YLA hruaitute nen Indo-Myanmar Defence Road sialna tura ruahman Saisihchhuah leh a chhehvel bakah Pangkhua hmun hmate an enfiah a. Pangkhua leh a chhehvela a mihring chenna in leh ramte ti chhe lo thei ang bera kawngpui hi sial a nih theih dan tur a hmunah enfiahin ruahmanna siam a ni.
Central YLA hruaitute hian Tuichhak tlang dunga YLA Branch leh Sub-Hqrs-te an tlawh nghal a, an mamawhte hlan in, Sangau leh a chhehvela raltlan awmte hnenah mutbu thahnem tak an hlan bawk.
Kawngpui sialna tur enfiah leh raltlante ṭanpuina hlana fehchhuak CYLA hruaitute Pu F. Lalrothanga Vice President, Pu Joseph Lalhmingthanga Chinzah, Gen. Secretary, Pu Lalngaihzuala Fanchun, Secretary, Kumpuan Committee, Pu LC. Lalhriatchhuanga, Treasurer, Kumpuan Committee, Lalpuiliana Thangnget, Info. Secretary DRS te niin, Bualpui 'Ng' Sub-Hqrs.YLA Secretary Pu Lalzidinga Chinzah leh Pu LZ Ringlawt, Secretary, Sangau Sub-Hqrs.YLA hruaituten an tawiawm a ni.