Mizoram State Assembly inthlanpui tunthla ni 7 a neih a, Lawngtlai District a bial pathum, Tuichawng, Lawngtlai West leh Lawngtlai East a vote tlate chu hmundang rualin December ni 3 zing dar 8 atangin chhiar tan tur a ni a, bial pathuma vote tlate chhiar tur hian ruahmanlawk ngaite buaipui chhoh mek a ni.
Bial pathuma vote tlate chu Govt. Lawngtlai College a bial pathum tan a hran theuha Counting Hall ruahman ah chhiar a ni dawn a, Polling Station 70 awmna Tuichawng leh Polling Station 69 awmna Lawngtlai West a vote tlate chu dawhkan 14 ve ve ah chhiar a ni dawn a, Polling Station 42 awmna Lawngtlai East a Vote tlate chu dawhkan 11 ah chhiar tura ruahman a ni.
Vote tla chhiartura ruatte bial chantur leh an dawhkantur te thliarfelna chu tunthla Ni 22 leh thlathar Dec 2 ah te neih tura ruahman niin, Political Party leh Candidate ten Counting Agent tur te an ruat chho mek bawk.
Inthlanpui neih ah khan Vote nei 36041 awmna Tuichawng ah Vote 29612 ( za ah 82.16) a tla a, Vote nei 29495 awmna Lawngtlai West ah Vote 24502 (za ah 83.07) tlain,Vote nei 25902 awmna Lawngtlai East ah vote 19564 (za ah 75.53) a tla a, bial pathum ah vote 80.58% a tla.