Lawngtlai District a bial pathum ah chuhtuma hmingpe mi 13 an awm.

Assembly Inthlanpui neih tur ah chuhtumte tan a hming pekluhhun chu vawiin tlai khan a tawp a, Lawngtlai District a bial pathum, Tuichawng, Lawngtlai West leh Lawngtlai East ah hming pelut 13 an awm.

Assembly Deputy Speaker Pu H.Biakzaua chuan a bial ngai Lawngtlai East ah MNF Candidate niturin a hming a pelut a, he bial ah hian tum hnih MLA a thlantlin lo ni tawh Pu H.Zothangliana INC leh Lawngtlai Chandmary bialtu MDC, Dr.Lorrain Lalpekliana Chinzah ZPM bakah BJP atangin Pu NC Muankima ten an hming an pelut.

Lawngtlai District a bial pathuma ngaihnawm ber tur a ngaih Lawngtlai West ah INC atangin bialtu MLA nilai, a zawna he biala tum hnih thlantlin lo  ni tawh Pu C.Ngunlianchunga chuan a bial ngaiah chuhtumin hming a pelut a, Lai Autonomous District Council a Chief Executive Member nilai, Pu V.Zirsanga chuan MNF atangin hming a pelut bawk a, ZPM atangin Pu Lalnunsema, BJP atangin Pu JB Rualchhinga, Independent (Zoramthar) atangin Pu Biakchhunga Chinzah ten an hming an pelut bawk.

Tuichawng bial ah MNF atangin Chakma Autonomous District Council a Chief Executive Member nilai Pu Rashik Mohan Chakma, BJP atangin  Pu Durjya Dhan Chakma  INC atangin Pu Hara Prasad Chakma,   bak ah  ZPM atangin Pu Shanti Jiban Chakma ten chuhtumin hming an pelut bawk.

Bial pathuma chuhtuma hming pekluhte hi naktuk hian endik a ni anga, endikna paltlang te tan karleh Thawhtanni thleng inhnukdawk duh tan hun hun a ni.

36-Tuichawng

BJP-Durjya Dhan Chakma 

INC -Hara Prasad Chakma

MNF -Rashik Mohan Chakma

ZPM-Shanti Jiban Chakma

37-Lawngtlai West

BJP- JB Rualchhinga 

 INC - C.Ngunlianchunga

MNF- V.Zirsanga

ZPM-Lalnunsema

Ind. (Zoramthar) Biakchhunga Chinzah

38-Lawngtlai East
BJP- NC Muankima 

INC - H.Zothangliana

MNF -H.Biakzaua

ZPM-Dr.Lorrain Lalpekliana Chinzah