Mizoram a Project panga telin Union Defence Minister in BRO hnathawh 90 a hawng.

Tunkar Thawhlehni khan Union Defence Minister Pu Rajnath Singh chuan Border Roads Organisation (BRO) kal tlanga India ram hmun hrang hranga hmasawnna hna thawh, Infrastructure Project sawmkua   a hawng

BRO-in Jammu & Kashmir-a Bishnah-Kaulpur-Phulpur Road-a Devak Bridge-a infrastructure project hawnna an buatsaihah Union Defence Minister chuan kawngpui 22, lei (bridge) 63, leiverh 1, thlawhna tumhmun te (airfield) 2 leh helicopter tumhmun (helipad) 2 chu ram tan a hlan a. He'ng zingah hian Mizorama Project Pushpak-in Chief Engineer Pu SP Kolipey-a kaihhruaina hnuaia project puitham tak an thawh panga (5) chu a tel a ni.

He'ng Mizorama project panga zinga pathum chu kawng pawimawh tak tak, km 20-a thui Zawngling-Mawhre-Sapi Road, km 30-a thui Kawlchaw-Phura-Tongkolong Road, leh km 47-a thui Tuipang-Laki-Lope-Lungpuk Road siam hna te a ni a. Pahnih chu lei pawimawh tak, Lawngtlai-Diltlang-Parva Road-a Sekulhlui Bridge, leh Sairang-Tuipuibari Road-a Dampa-Lui Bridge dawh hna te a ni a. He'ng hna thawh nan hian cheng vaibelchhe 438   lai sen a ni a. Fur ruahtui vanga harsatna, leh hna thawhna hmun kilkhawr leh kal harsat avanga harsatna hrang hrang karah hna hi thawh a ni a. He'ng hmasawnna ruhrel din tharte hian hmun kilkhawr taka chengte tan inkal pawhna tha zawk siamsakin, Mizoram tan ei leh bara thanna leh hmasawnna kawngah a tangkai hle dawn a ni.

Hmathlir thui tak nei mi, Director General of Border Roads Lt. General Rajeev Chaudhary, VSM kaihhruaina hnuaiah BRO chuan kawngpui sial leh lei dawh lamah kum thum chhungin hmasawnna chhinchhiah tlak tak tak a nei a. Hei hian ram chhung hmun hla leh kilkhawr ber berte thlun zawmin, ram chhung venhimna hna thawh pawh a tihawlsam phah lehzual hle a ni.

Project Pushpak te inpekna leh thawh rimna azarah Mizoram chuan inkal pawhna kawngpui, lei dawh leh hmasawnna ruhrel dangah hmasawnna chhinchhiah tlak tak tak neiin,he'ng hian ram hmasawnna leh mipuite khawsak dawm kannaah a tha zawngin danglamna nasa tak a thlentir a ni.