Nimin August 24, 2023 khan Dr.David Zothansanga Sr.Chief Medical Officer chuan MJA Lawngtlai District hruaitute chhun thingpui a inpuia, Lawngtlai District a Health Department hmalakna hrang hrang te an sawiho.
Sr.CMO chuan Lawngtlai District chu a bikin Lawngtlai West leh Tuichawng lam chu fur ruahtui tlaklai phei chuan kalpawh harsa tak tak, a michengte pawh tlema khawsak hniam leh harsa tamna a ni a, heng hmunahte hian Health Department hmalakna chu duh anga a chaktheihloh chang a awm tih sawiin, hma an lak thinna ah khawtlang hruaitu, Tlawmngaipawl leh mipui lamin an thawhpui nasat a ngaizual thin tih sawiin, nasa zawka tanrual a pawimawh a ti.
Dr.David Zothansanga chuan Health Department chuan tihtur ruahman a neihte theihtawp chhuahin a bawhzui thina, mipui hriselna atana hma an lakna ah Lawngtlai District a Tlawmngaipawl leh mipui ten an thawhpui thinna ah lawmthu a sawi a, Lawngtlai Journalist te chu Health Department nen pheikhai rualtaka an lo kal thinna chu chhawmnungzel tura sawmin, tanhona atangin hmasawnna a awm thin a ti.
He inkawmhona ah hian Dy.CMO, Dr.S.Thaizi chuan Lawngtlai District a hma an lakna hrang hrang a sawifiah a, Health Department lam chuan mipui lam tihtur leh ngaihpawimawhtur leh zawmtur an ruahmante an bawhzui laiin, a dawngsawngtu lamten an zawmthat loh chuan a nihtur ang a nipha lo thin tih sawiin, thawktuten tihtur an ruahmante thataka mipui lamin an zawm chuan tun aiin hriselna lamah Lawngtlai District chuan hma a sawn an beisei thu a sawi.
MJA Lawngtlai District hruaitute chuan Health Department chu hma an lak thinna fakin, mipui sukthlek tlema hiam deuhna ah pawh dawhthei taka an beih fat fatna chuan rahtha a chhuah mek a an hriat thute, Journalist ten an tihve tur ang chi ah theihtawp chhuahzuizel an tum thu an sawi.