Lairam Isua Krista Baptist Kohhran chuan vawiin khan ngenna (Appeal) siamin, Manipur State-a Kuki-Zo tribal mite chunga Meitei community chhunga mite'n tharum thawhna leh nunrawnna uchuak tak an thlentir hi Lairam Isua Krista Baptist Kohhran chuan runthlak a tihthu tarlangin, rapthlak a ti tak zet a.
LIKBK in thuchhuah a siamah chuan, May ni 4, 2023 khan Meitei mipui inhawr khawmin Kuki-Zo community hnuaia Vaiphei hmeichhia pawisawi lote chhun engah, saruak ngalngata khawlai dung fanpuiin, an pawngsual zui a ni tih thu hriat hi a rapthlakin, pai dam rual a ni lo. Heti anga nunrawng taka chetna hi kan dem tak zet a, a tuartute hi dan hnuaiah dik taka rorelsak kan phut tlat an ni tih an tarlang.
Manipur-a Kuki-Zo community-te hi kan thlawpin, kan dinpui tlat a. He thil rapthlak tak tuartute leh an chhungte tan Pathian hnenah chakna kan dilsakin, rinnaah ding nghet tlat se tih hi kan ṭawngṭaina a ni. Kohhrante leh Kristian zawng zawngte dikna a lo dinchan a, thil tisualtute hrem an nih thuai theih nan bang lova ṭawngṭai turin kan ngen a. Manipur-ah hian remna leh muanna a awm leh thuai kan duh tak zet a. Manipur-a remna leh muanna leh rorelna dik a awm ngei theih nan ṭang ruala hma la turin mi zawng zawng kan ngen a ni, tih LIKBK in ngenna an siamah chuan tarlan a ni.
