Health Minister hi District Medical Superintendent Dr Beiparysa K. hovin thawktute'n lo dawngsawngin, an dinhmun, an mamawh leh harsatna te a hnenah hian an lo thlen a. District Hospital Lawngtlai chu fang kualin, an dinhmun a enfiah a. H&FW hotute leh DHL-a thawktute nen damdawi in tihchangtlun dan tur hrang hrang an sawi ho nghal.
CMO Conference Hall-ah health department-a thawktute nen inkawmhona neih niin, Health Minister chuan hriselna lamah Lawngtlai District-ah hmasawnna hmuh tur tam tak a awm laiin, tan lak ngaihna lai eng emaw zat a la awm tih a sawi a. Hriselna kawnga hma laknaah sawrkar leh thawktute chauh tih theih a ni lo va, mipuite nen tang ruala hma lak a tul tih a sawi a. Mizoram chu India rama Malaria hluarna state zinga mi a nih thu leh Lunglei, Lawngtlai leh Mamit District-te chu Malaria hluarna a nih thu sawiin, he'ng district pathumah te hian Malaria dona kawngah ngawrh zawka hma lak tuma ruahmanna siam a nih thu te, State sawrkarin theih tawp a chhuah bakah, sawrkar laipuiah pawh hma lakna tura mamawh te thlen a nih thu a sawi a, Malaria dona kawngah hian mipuite tang ho i la, Malaria hi kum 2025-ah chuan Mizoramah um bo theih a nih a rin thu a sawi
Health Minister chuan COVID-19 vangin sawrkar hma lakna tur hrang hrang khaihlakin, hna lak theih loh tam tak a awm a, tunah hian hriselna kawnga thawktu indaih lohna hnawh khat tur leh hmanrua leh hmasawnna ruhrel tihchangtlun kawngah pawh hma lak zel theih a beiseiawm tih a sawi