CADC ah Political Party pali ten an Candidate tur an puang tawh.

Thlathar May 9 a Chakma Autonomous District Council inthlanpui neihtur ah, chuhtumte tana hming pekluh hun chu naktuk Thawhtanni khian a tawp dawn a, Political Party hrang hrang ten an Candidate tur an puang tawh

Tuntum  Chakma Autonomous District Council inthlanpui neihtur ah hian tun dinhmuna a landan chuan bial 9 chu  kil li atangin BJP, INC, MNF leh ZPM ten an inchuh dawn a, bial 11 ah BJP, INC leh MNF te an inbei ang.

 Seat 20 awmna CADC ah hian BJP, INC leh MNF ten bial awm zawng zawng chuhkim turin Candidate tur an puangfel tawh a, ZPM chuan bial kua a an candidate tur an puang tawh bawk

Party pali ten an Candidate tur an puan zing ah CADC a Chief Executive Member lo ni tawh an awm theuh a, BJP atangin CEM lo ni tawh Amit Kumar Chakma chu Rengkashya bialah a ding dawn a, INC atangin CEM hlui Adikanti Chakma chu Demdep bial ah a ding dawn a, MNF atangin CEM lo ni tawh Kali Kumar Tongchangya chu Fultuli bial ah a ding dawn a, ZPM atangin CEM lo ni tawh pahnih awmin Chhotapansury ah Santi Jiban Chakma, Vaseitlang atangin Bhudda Lila Chakma te an ding ang.

Candiadte puantawh atanga a landanin BJP ah mithar 14, INC ah 17, MNF ah 7, ZPM ah 4 an awm.

CADC-ah hian MDC constituency 20 awmin, polling station 70 a awm a. Vote nei thei mipa 18,208 leh hmeichhia 17,677, an vaiin mi 35,885 an awm.

Inthlanna felfai leh muanawm a awmtheih nan Lawngtlai DC, he inthlanna a Returning Officer Pu David Lalthantluanga kaihhruaina hnuaiah ruahmanna hrang hrang siam niin a tahtawlin bawhzui chho mek a ni.