Lawngtlaiah Republic Day 2023 hman dan tur rel a ni

Sorkar thuchhuah a tarlan anih danin,  vawiin khan Lawngtlai DC Conference Hall-ah Additional Deputy Commissioner Pu Abraham Beirazi Khithie hovin Lawngtlaia Republic Day 2023 hman dan tur rel a ni a. State sawrkar leh LADC official-te leh pawl hrang hrang ai awhte an tel.

Chairman Pu Abraham Beirazi Khithie chuan member kal khawmte lawmna thu sawiin, kum hmasa lama ram ni pawimawh hman ṭhin dan tlangpui a tar lang a. Kum 2023-a Republic Day hman dan tur sawi ho niin, sports discipline ṭhenkhatin Republic Day 2023 puala inelna (tournament) buatsaih an dilna pawh thlir ho a ni bawk.

Meeting chuan kumin Republic Day lawmna hi Central YLA Playground-ah January ni 26, 2023 (Ningani) zing dar 8:00-ah hman ni se, tiin a rel a. Republic Day lawmna ceremonial parade buatsaih ṭha tih niin, ruahmanna siam turin parade sub-committee din nghal a ni.

Republic Day lawmna atana thil pawimawh hrang hrang bawhzuia hma la turin Technical Committee din a ni a. Department leh tlawmngai pawlte kovah mawhphurhna hrang hrang nghah a ni bawk.

Republic Day ni-ah hian sawrkar office, zirna in leh sawrkar quarters-ah te hnam puanzar zar vek tura tih a ni a. Lawngtlai khawpui chhunga damdawi in pathum - District Hospital Lawngtlai, Lairam Christian Medical Centre & Hospital leh Christian Hospital Lawngtlai te, chhawmdawlna in - Lairam Motherless Home te, District Jail te, Lairam Rescue Centre leh Gilead Drop-In Centre-ah te Republic Day pual ṭanpuina thilpek pek leh ni se, tih a ni bawk.

Kumin Republic Day lawmna puala tournament buatsaih diltu sports association pahnih - District Volleyball Association Lawngtlai leh Lawngtlai District Badminton Association te dilna chu remtihsak a ni bawk.