Mizoram Khawpui Fai Intihsiakna 2022-ah Lawngtlai khawpui chuan Fastest Mover District Headquarters Award dawngin, District hmunpui 10 zingah fai lamah 4-na a ni
Urban Development & Poverty Alleviation (UD&PA) Department-in Mizoram Khaw Fai Intihsiakna (Mizoram Cleanliness Competition) 2022 a buatsaih result chu tukina Aizawl AR Lammuala Republic Day lawmnaah puan niin, lawmman sem a ni a. Lawngtlai khawpui chuan Fastest Mover District Headquarters Award dawngin, District hmunpui 10 zingah fai lamah 4-na a ni.
Mizoram Cleanliness Competition (MCC) 2022-ah hian category pathumah inelna buatsaih niin, special award panga (5) siam a ni a. Special award zinga pakhat, District hmunpui zinga faina kawnga hmasawn chak ber lawmman, "Fastest Mover District Headquarters Award" chu Lawngtlai District-in dawngin, he Award hian ₹ 55,555/- leh citation a keng tel a. Award hi Lawngtlai District UD&PA leh LADC Sanitation Department ai awhte'n Mizoram Larsap Pu Hari Babu Kambhampati kut aṭangin an dawng a ni.
Category-II (District Headquarters) inelna huangah Aizawl tih loh District hmunpui 10 awmin, pakhatna Khawzawl, pahnihna Lunglei leh pathumna Serchhip te an ni a. Lawmman dawng pha lo chin chiahah Lawngtlai chu awmin, 4-na a ni.
Kum 2017 aṭang khan MCC hi buatsaih ṭan a ni a. District hmunpui inelna huanga Lawngtlai khawpui dinhmun chu heti ang hi a ni:
2017 - 8-na (8 Districts)
2018 - 7-na (8 Districts)
2019 - 5-na (8 Districts)
2020 - 10-na (11 Districts)
2021 - 9-na (10 Districts)
2022 - 4-na (10 Districts)
Lawngtlai khawpuiin faina kawnga hma a sawn theih nan Lawngtlai DC kaihhruainain UD&PA Department leh LADC Sanitation Department leh LAD te ṭhahnem ngai taka thawk hovin, khawpui chhunga village council, tlawmngai pawl, kohhran, sawrkar office leh zirna in, media leh mipuite vantlang te'n mahni zawn ṭheuhvah ṭawiawmin, hma an la bawk a. Khawpui fai endiktute pawhin hmasawn chak bera an puan khawpin a rah chu hmuh theihin a lo lang chhuak a ni.
MCC 2022-a Lawngtlai khawpuiin Fastest Mover Award a dawn leh District hmunpui zinga 4-na dinhmun a luah chungchangah UD&PA Lawngtlaia District Project Officer Pi TT Beikhaizi, chuan lawmawm a tih thu sawiin, Lawngtlai khawpuiin faina lama hma a sawnna kawnga tha thawhtu zawng zawng chungah lawm thu a sawi a. Chutih rualin, hmasawnna tur tam tak a la awm avangin hmasawnna chak zawk leh hlawhtlinna duhawm zawk chang thei tura ṭan la sauh sauh turin Lawngtlai mipuite a sawm nghal a ni