Krismas chu nikhat chauhin a dang tawh a, Lawngtlai Police ten zalen leh him taka mipuiten hunpui an hmantheih nan chhunzan zawmin khawpui chhung boruak vawngdai tur leh harsatna thlengthei vengin an duty tan tawh.
Vawiin khan Lawngtlai S.P mawhphurhna lamektu Pu C.Lalruatkima chuan Lawngtlai District MJA te thingpui inpuiin, Lawngtlai khawpui chhung hmun 6 ah Duty Post siam a nih thu sawiin, a tuldan a zirin siambelh theih a nih thu a sawi a, heng Duty Post ah te hian Police te chhunzan zawma an duty bakah, khawpui chhung ah an tlankual reng thu a sawi a, Branch YLA te nen thawhhona thatak hnuai ah buaina leh harsatna thlengthei ven hna an thawk tih a sawi a, Lawngtlai Police te chuan mipui te hlimtaka Krismas leh kumthar hmangturin duhsakna an hlan a, a bikin khawpui chhunga lirthei chetsualna a thlenloh nan lirthei khalhtute fimkhur zual turin an chah a, khawpui chhung ah darkar khat ah Kilometres 20 aia chak a tlan phal a nihloh chu an sawinawn bawk.
Vawiin a Lawngtlai SP hova inkawmhona ah hian Lawngtlai SP chuan Pu Lalngheta Ralte Accredited Journalist chu Police te theihtawpa a puih thinna vangin Chawimawina (Appreciation Certificate) an hlan, Pu Lalngheta Ralte hi Lawngtlai District a Prasar Bharati Correspondent (AIR /DD News) thawklai a ni a, The Lawngtlai Post Newspaper Editor niin, Lawngtlai District MJA President nilai a ni.
