Mizoram Legislative Assembly Speaker Pu Lalrinliana Sailo chuan National Highways and Infrastructure Development Corporation Limited (NHIDCL) enkawlna hnuaia National Highway kawngpui laih zau hna thawh mek, Lawngtlai leh Thingfal inkar chin chu nimin khan tlawhin, an hna thawh kal mek a enfiah a, duhthusam lo lai awmte chu a rang lama siam that hna thawk turin NHIDCL Project Manager chu a ngen nghal.
Speaker Pu Lalrinliana Sailo chuan National Highway kawngpui zauh hna thawh mek chu Mizoram mai bakah, India ram tan pawha kawngpui tangkai a nih dawn avangin a tha thei ang bera thawh a pawimawh thu sawiin, hna thawktute chu neitu rilru pu-a thahnem ngai taka thawk turin a chah a. Kawng kual leh awih dan te, tuiluankawr ruahman dan leh hna hrang hrangah a bulthut atanga uluk taka thawh a pawimawh thu a sawi a. Kawng thlang lama lung rem thenkhat duhthu sam lo lai leh kawngpui sir thlang lam tlang khi thenkhat siam that ngai laite leh hna thawh fuh tawk lova a hriat laite chu hna viltute hnenah a thlen nghal bawk.
Speaker hi Lai Autonomous District Council- a Executive Member Pu C. Hrangthianga leh MNF District Headquarters Lawngtlai hruaitu thenkhatten an tawiawm a ni.