Lawngtlai District a ASF vangin Vawk 200 chuang a thi tawh, Lawngtlai College Veng a Vawk thi chu ASF vei a ni tih Rapid Antigen Test hmangin finfiah a ni.
African Swine Fever chuan Lawngtlai District a tuamchho mek a, Lawngtlai khawpui chhungah pawh ASF vanga Vawk thi leh damlo an awm nual
Vawiin khan Lawngtlai DC Pu Amol Srivastava hovin Vawk natna hrileng chungchang ngaihtuahin State leh LADC a AH & Vety hotute, Piggery Society hruaitute leh Official pawimawh leh Chanchinbumite an thukhawm a, tunhnai a Lawngtlai College Venga Vawk thi chu Rapid Antigen Test ah ASF vei a ni tih finfiah a nih thu sawilan a ni a, Piggery Society hruaituten an sawidnain College Veng ah hian Vawk 26 thitawhin,vawk damlo a la awm nual bawk.
Official ten an sawidanin Sorkar hriatpuina a Vawk tihhlum, Pangkhua ah 143, Sangau ah 2, Cheural ah 5 awm tawhin, ASF tih finfiah chiahloh leh Sorkar hriatpuiloha thi Pangkhua ah 19, Sangau ah 30 Vawmbuk ah 9 Cheural ah 2 a awm tawh bawk.
Lawngtlai DC Pu Amol Srivastava chuan Vawk natna hrileng chu theihtawp chhuaha tangtlanga dolet ngai a nih thu sawiin, vawk vulhtute chauh an fimkhur hian awmzia a neithui thei tawhlova, hripudarh theitu zingah mihring kan tel vangin, fimkhur a ngai hle a ni a ti.
Vawiin Meeting ah hian Lawngtlai khawpui chhung, leh District chhung hmundangah ASF a darh zelloh nan hmalakna tur hrang hrang an ruahman a, khawpui chhung bikah Ran talh phalna neilo chuan talhlose, talh phalna nei te pawh, an talhtur te AH&Vety mithiamten talh tlak a ni tih an finfiah chuah talh se, ran talhna hmunte endik thin nise an ti a, mipui lam ah uar leh zauzawkin fimkhurna tur, tihtur leh tihlohtur te puanzar nise an tih bakah, Lawngtlai khawpui chhungah a tul thut a Vawk suat a ngaih palh takin, a phumna tur hmun ruahmansa KMMTTP kawngpui kam a mi chu enzui nise an ti bawk.
Tags
News