Nimin khan Additional DC, Pu James Miahlung hovin State sawrkar leh LADC-a AH&Vety hotute, sawrkar official pawimawh dangte leh khawpui chhunga VC/Village Level Response Team aiawhte chu Lawngtlai khawpui chhunga vawk natna hri leng chungchanga hma lak zel dan tur an ngaihtuah.
ASF laka himna tura sawrkar hma lakna chu theih tawpa puibawm turin VC-te chu ngen an ni a. Hma lakna tur ruahman zingah, Lawngtlai khawpui chhunga vawk talh tur, AH&Vety mi thiamte atanga certificate neite pawhin an talh hmain an awmna veng VC-ah report hmasa zel se tih te, ASF chungchanga mipui leh vawk vulhtute hriat tur pawimawh puanzar tur State leh LADC-a AH&Vety Department lamin lo siam se tih leh VC-te'n an veng huam chhungah hmun dang atanga vawk lalut an hriat chuan DC-ah report theh lut thin se anti.
Pangkhua lama DC thupek bawhchhiaa vawk lak luh nia hriat chu police lamin an chhui mek thu ngaihthlak a ni a. Lawngtlai khawpui chhunga vawk la lut nia rinhlelh mi pathum chu police-in an chhui chian hnuah pathum zinga pahnihin an la lut ngei tih finfiah a nih thu leh, hrem an nih theih nan hma lak mek a nih thu sawilan a ni bawk.