Central Young Lai Association (CYLA) chuan thuchhuah siamin Lawngtlai District Hospital-ah doctor (gynaecologist) dah turin Mizoram sorkar an ngen a, August 10, 2022 thlenga dah a la nih loh chuan an thiam ang anga hmalak zui an tum thu leh Independence Day boycott an tum thu an puang.
Lawngtlai District Hospital-ah thawktu an indaih loh avangin doctor dah belh phûtin CYLA chuan May 25-28, 2022 chhung khan picketing an huaihawt a; picketing an huaihawt chhan ber leh sorkar laka an beisei zawng zawng tihhlawhtlin a ni lo chungin May 26 & 27-a sorkar thuchhuak angin doctor pathum - gynaecologist, pediatrician leh ENT specialist-te dah an nih avangin picketing chu an titawp a ni.
Doctor dahna thupek a chhuah atanga thla hnihah pawh Lawngtlai district-in an mamawh ber pakhat gynaecologist a la awm loh thu sawiin CYLA chuan, 'Kan mamawh ber pakhat gynaecologist a awm ngei theihna tur hian hmalak chhunzawm ni se,' tia an rêl thu an tarlang a; "Thu mai ni lo, a tak ngeia gynaecologist an awm theihna tura hma min laksak turin Mizoram sorkar kan ngen nawn a, August 10, 2022 thleng kan ngaichâng dawn a ni," an ti.
CYLA chuan, "Kan harsatna leh mangannate chinfel a nih loh chuan CYLA chuan District Hospital, Lawngtlaia gynaecologist an awm ngei theihna turin August 11, 2022 atangin kan thiam dan danin hma kan la dawn a, Independence Day boycott thlengin hmalak tum a ni," an ti.
