Nimin khan MJA Lawngtlai District chuan Lairam Christian Medical Centre & Hospital an tlawh a, Damdawiin inrelbawlna leh mipui lamin an tangkaipui dan te Manager, Pu V.Lailiankima’n a lo hrilhfiah.
LCMC&H leh MJA Lawngtlai District te hian thawhdunna thuthlung siamin, he an thawhdunna kalzel ah MJA Lawngtlai District Member te Family Declaration chu District MJA hruaitute chuan Manager hnen ah an hlan a.
MJA Lawngtlai District President Pu Lalngheta Ralte chuan, Mizoram hmundanga awmvelo, Damdawiin leh MJA te thawhdunna Lawngtlai ah thataka kalpui a ni chu lawmawm an tih thu sawiin, MJA Member leh an chhungte chuan, thawhdunna huangchhungah hamthatna an dawng nasa tih sawiin, LCMC&H thuneitute chungah lawmthu a sawi a, MJA lam chuan an tihtheih chin ah LCMC&H tan theihtawp chhuah zel an tum tih a sawi.
LCMC&H ah hian tun dinhmun ah khum 60 awmin, khum awl a awm hman meuhlo tih Damdawiin thuneitute chuan an sawi a, Damdawiin tichangtlungturin hmalakna kalpui reng a nih thu te, khum pathum awmtheihna tur ICU buatsaihmek a nih thute, Oxygen Plant pawh buaipui mek a nih thute, Test chi hrang hrang LCMC&H ah an kalpui theih thute Dialysis pawh an tih reng thu te an sawi.