.jpg)
LADC Sorkar chuan, mipakhatin ram zau tak tak an hauh chu enfel tul a ti a, Diltlang South MDC bial ah bultan niin, ramruak Hactare 32 zet hmuhchhuah a ni a, heng ramruakte hi leilung behchhana eizawnna kalpuitute hnen ah sem tum a nih thu Diltlang bialtu MDC chuan a lo sawi tawh a, a lawmawm khawp mai.
A tithei deuh ten ram zau tak tak an hauha, an pass neih nen a inmillo a awm nual tih Diltlang ram atanga Hactare 32 zet ram awl hmuhchhuah a ni hian a tichiang a, LADC huamchhunga MDC bial zawng zawng ah ram tehthat hna hi thawh thuai thuai nise a duhawm ngawt ang.
Entirnan Hactare 3 ram pass neikhan a tak takah chuan Hactare 3 aia zaudaih a hauh a, Sorkara chhiah a chhunluh aia zau ram a hauh tihna a ni a, dan ah hremna lam ziak kilkel a awm chiahlo a nih pawhin, thildik ziktluak a nilo tih erawh a chiang awm e.
Ram tehthat hna hi zawhfel vek a nih hun chuan ram ruak, a neitu awmlo zautak hmuhchhuah a nihngei a rinawm a, chung ram awl chu ramneilo, khua leh tui ten eizawnna bultan nan an hmang thei dawn a, Sorkar ah chhiah tam zawk a luhphah a nga, diktakin ramneituten an ram chhiah an pektheih phah dawn a,a hlawkna leh hlutna hi ram tan chhenfakawm tham a tling ngei ngei in a rinawm ani.