Nimin khan Lawngtlai District AIDS Prevention and Control Committee (DAPCC) chu an Chairman, Lawngtlai DC, Pu Amol Srivastava hovin Lawngtlai DC Conference Hall-ah an thu khawm a. He hunah hian Lawngtlai khawpui chhunga kohhran thalai, tlawmngai pawl, VC Association, zirlai pawl leh zirna in ai awhte, chanchinbu mi leh HIV/AIDS dona kawnga thawktu hrang hrangte pawh sawm tel an ni.
DC, Pu Amol Srivastava chuan Lawngtlai District-a HIV/AIDS darh zel chu ngaihmawh a tul tak zet tih sawiin, HIV/AIDS darh zel tur ven nan sawrkar department, kohhran, tlawmngai pawl leh mipuite tan rualna leh thawh hona a pawimawh thu a sawi a. Damdawi hman sual leh mipat hmeichhiatna hman khawloh atanga darh a tam ber avangin thalaite hnena nun kawng dik kawhhmuh chu hma lakna tur pawimawh tak nia a hriat thu a sawi.
District AIDS Control Officer Dr S. Thaizi hnen atangin Lawngtlai District dinhmun ngaihthlak a ni a. Lawngtlai District-in harsatna a tawh hrang hrangte tar lan niin, a chin fel dan tur rawtna te, HIV/AIDS darh zel tur venna atana hma lakna tur te, District dinhmun hriat chian lehzual dan tur te, HIV hrik pai nuin a naupaia a kai chhawng tur ven nana hma lakna tur te, mipui nawlpui leh HIV/AIDS kai mai hlauhthawnawm dinhmuna dingte zinga zirtirna kalpui zel dan tur leh hmachhawp hrang hrangte he hunah hian sawi ho a ni.
Tags
News