Rural Development (RD) Department Minister Pu Lalruatkima chuan vawiin khan Lawngtlai tlawhin, RD Department hnuaia District Rural Development Agency (DRDA) leh Block Development Office (BDO)-a thawktute nen inkawm hona hun an hmang.
Minister hian DRDA office tlawh hmasain, Lawngtlai DRDA Project Director Pi Marilyn Rualzakhumthangi leh thawktu dangte'n an lo dawngsawng a. BDO office a tlawhnaah BDO charge la mektu Pi Marilyn Rualzakhumthangi leh thawktute'n an lo dawngsawng bawk a. He'ng office-ahte hian officer leh staff-te nen an hna thawhna kawnga harsatna leh mamawh an neihte bakah, hmasawnna tur hrang hrangte an sawi ho a ni.
Minister chuan RD Department hnuaia thawktute chuan ṭan rualna, inpekna, thawh hona leh inpumkhatna ṭha tak nena an thawh avangin department hnuaiah hmasawnna hmuh tur tam tak a awm tiin, thawktute hnenah lawm thu a sawi a. COVID-19 hri leng vanga ram mipuiin harsatna an tawh mek laiin, a enkawl RD department hnuaiah mipuite khawsak tihawlsam nan ni za inhlawhna kalpui a ni te, MzSRLM hnuaiah self help group kal tlanga ei zawnna ṭhahnem tak siam a ni te chu thingtlang mi khawsak harsa zawkte tan malsawmna a nih thu a sawi a. State ṭhenkhatin MGNREGA hnuaiah ni 25 chauh te inhlawhna an neih theih laiin, Mizoram chuan ni 100 inhlawhna a pe thei ṭhin a, kumin atan ni 90 inhlawhna tur chauh hmuh a ni chungin, a dang pawh la dil belh theih a nih thu sawrkar laipui aṭangin dawn a ni a, a thlamuanthlak hle a ni, a ti a. RD department hnuaia hma lakna hrang hranga hlawhtlinna awmte tar langin, hna thawhna tur sum mamawh chungchangah department-in sawrkar laipui leh state sawrkar duhsakna an chang ṭhin chu lawmawm a tih thu a sawi bawk.
Department-a thawktute chu anmahni dawrtute'n an hriat thiam loh leh an hriat duh te dawhthei taka lo hrilhfiah a, mi retheite innghahna leh tluk luh ngamna nih tum zel turin a chah a. Sawrkar hna thawkte chu Conduct Rules-in a phuar tih hria a, social media-a thu dik tawk lo hmanga sawrkar sawichhiatna laka inthiar fihlim tur leh sawrkar hma lakna a hlawhtlin theih nana theih tawp chhuah turin a chah a ni.
Hun rei tak DRDA hnuaia a nghet lova thawk, tun hnaia sawrkara a ngheta lak luh tharte chuan Minister hnenah hian a hma lakpuina avangin lawm thu an sawi a. DRDA leh BDO hnuaia thawktute'n an mamawh hrang hrang lo thlenin, office building leh infrastructure tihchangtlun dan tur te an en ho nghal bawk.
Minister hi LADC-a Executive Member, I&PR enkawltu, Pu Lalropuia Chinzah, MDC Pu Lalthanmawia Colney, Lawngtlai DIPRO Pu C. Lalhruaitluanga leh Lawngtlai District MJA hruaituten an ṭawiawm a ni.
Tags
News