Lai Autonomous District Council in kum 50 a tlin denchhenin, Golden Jubilee Organising Committee Chairman in vawiin khan Chanchinbumite a kawm.
LADC a Art & Culture enkawltu Pu BN.Thangpuia, LADC Golden Jubilee Organising Committee Chairman chuan a Chamber ah Lawngtlaia Chanchinbumite kawmin, LADC Golden Jubilee chu hlawk leh tangkai takin kumin chhung hian a lawmna hrang hrang buatsaih tum a ni a ti a, Golden Jubilee lawmna, hawnna hi naktip Zirtawpni khian neihtur a ruahman niin, a lawmnapuiber chu kumin kumtawplam ah neihtum a ni a, Golden Jubilee pual hian Organising Committee hnuai ah Committee peng hrang hrang sawm din a nih thu Pu BN Thangpuia chuan sawiin, Zirna, Faina, Hnam ziarang humhalh leh Ramngaw leh Nungcha humhalh bakah infiamna leh Thalai te tana hlawktur kawng hrang hrang, Golden Jubilee lawmna neih chhung hian neih tum a ni a ti.
Pu BN Thangpuia chuan LADC a hun chhinchhiahtlak bikah MNF Party chuan Council ah Sorkarna a chang tih sawiin, Pathianin an Sorkar chu rintlak leh chawisan tlak ah a dah ni a a hriat thu sawiin, LADC huamchhung leh hmun hrang hranga Laifa awmte Golden Jubilee chuan in unauna thazawk a hrinchhuah ngei a beisei thu a sawi bawk.
LADC Golden Jubilee Organising Committee Chairman hian Chanchinbumite chu Golden Jubilee T-Shirt a pe theuhva, Chanchinbumite chuan theihtawp chhuahin, tangkaina an neih ve ah Golden Jubilee pualin tan an lakzel tur thu an sawi.
Lai Autonomous District Council hi kum 1972 khan Pawi Lakher Regional Council atangin District Council puitling neiin dah a ni a, kumin hi kum 50 a tlinna niin, LADC Sorkar chuan Hnam inpumkhatna leh hmasawnna lam hawiin hlawk takin lawmna tur a ruahman a ni.
Tags
News