Ambulance inhlan chhawnna puala Lawngtlai DC Office a hun hmanah Dr Andrew H. Vanlaldika chuan Lawngtlai District mamawh an thlente ngai pawimawha NSTFDC te'n Ambulance an pek avangin lawm thu a sawi a, hriselna kawnga hmasawnna tur leh harsatna hrang hranga chhawk zangkhaitu a nih a beisei thu a sawi.
Ambulance inhlan chhawnna hunah hian district administration official-te, medical lam official-te, DRDA Project Director, Additional SP leh DIPRO te an tel a. Ambulance chabi leh document pawimawh hrang hrangte chu Bawrhsap chuan CMO kutah a hlan nghal a. CMO chuan District Bawrhsap hma lakna avangin lawm thu a sawi bawk a ni.
NSTFDC hi Govt of India Ministry of Tribal Affairs hnuaiah kum 2001 khan Scheduled Tribe te hmasawnna tura sum leh pai leh kawng hrang hranga tanpuitu pawl angin din a ni a. India rama Scheduled Tribe-te hmasawn nan theih tawpin hma an la reng a ni.
Tun tuma NSTFDC-in Lawngtlai District tana Ambulance an pek hi cheng nuai sawm chuang man a ni a. Nikum September thla atang khan District Administration hma laknain Corporate Social Responsibility (CSR) kal tlangin state pawn company leh foundation hrang hrang atangin Lawngtlai District chuan tanpuina cheng nuai sawmnga hu vel a dawng tawh a ni.