Mizoram Journalists' Association (MJA)-in kum sawmnga a tlin (golden jubilee) chhinchhiah nâna MJA Lawngtlai District-in Lawngtlai Press Club-a lung an phun chu Zirtawpni khân Lawngtlai East Bialtu MLA, Agriculture Development Board Vice Chairman Pu H. Biakzaua chuan a hawng a, Lungphun hawn programme hman hma hian MJA Lawngtlai District te chuan an thawhpui Damdawiin Lairam Christian Medical Centre & Hospital ah a tul apianga an hman atan Rs 5000/- an hlan
Pu H. Biakzaua chuan District MJA member-te chu MJA Golden Jubilee chibai bûkin, duhsakna a hlân a. Sawrkar khalh ngîl leh mipuite hnêna thu tangkai theh darh kawngah chanchinbu mite an pawimawh hle tih sawiin, Mizoram sawrkar pawhin ngai pawimawhin, an tân MJA pension scheme a ruahman mêk a, rei lo têah hman theih a nih thuai a beiseiawm, a ti a. Lawngtlai District MJA hma lâkna leh hna thawh dân thlîrin lungawithlâk hlea a hriat thu sawiin, chanchinbu mite'n mipui rilru sûkthlêk kuai her tûra theihna an neih chu a tha zâwnga hman a pawimawh thu a sawi .
Pu H.Biakzaua chuan Lawngtlai District MJA member-te chu thawh hona tha, inlungrualna leh inpumkhatna nên hma lam pan zêl tûrin duhsakna a hlân a ni. Pu H. Biakzaua hian March ni 23, 2022-a Aizawla MJA Golden Jubilee lawmna leh General Conference-a an kalna tûr sênso phuhrûk nân District MJA te hi Rs 20,000/- (chêng sîng hnih) a hlân nghâl bawk.
MJA Golden Jubilee lungphun hawnna hun hi District MJA Treasurer Pu H. Lalrinmawia'n kaihruaiin, Lairam Higher Academy of Science (LAHAS) Principal Rev. C. Chanchinmawia'n hunserh a hmang a. District MJA President Pu Lalngheta Ralte chuan thu sawiin, Mizoram sawrkar leh Lai Autonomous District Council sawrkar te'n journalist-te an ngaih pawimawh thinna leh inhawng taka an thawhpui thinnaah lâwm thu a sawi
Lawngtlai District MJA te'n MJA Golden Jubilee lungphun hawnna hun an buatsaihah hian Khuallian Pu H. Biakzaua hi LADC-a Executive Member i/c LAD, etc. Pu C. Rongura, Town Committee Chairman Pu Sanghuliana Mualchin, MDC pahnih Pu T. Lalengmuana leh Pu K. Hre Kung te leh MNF District Headquarters President leh hruaitu dangte'n an tawiawm a...
Lawngtlai DIPRO Pu C. Lalhruaitluanga leh LADC I&PR Department ai awh Pu PC Chuaudinga te'n hun an hmanpui bawk.