Dr Andrew H. Vanlaldika chuan January ni 27 - 29 chhunga District chhung hmun hrang hranga raltlante inkulhna hmun a tlawhnaa a thil hmuh leh hma lak dan a sawi a. Task Group on Myanmar Refugees Nodal Officer, SDO (Sadar) Pi TT Beikhaizi chuan raltlante enkawlna kawnga hma lakna kalpui mek sawiin, tun dinhmunah Lawngtlai District chhungah Myanmar atanga raltlan lo lut mi 5,300 chhinchhiah tawh an ni a. An zinga mi 3,522 chu kum 18 chung lam niin, hmeichhia 1,739 leh mipa 1,783 an ni a, kum 18 hnuai lam mi 1,778 an awm bawk. An khawsakna, an ei leh in tur leh damdawi bakah, an mamawh hrang hrangte a tul dana ngaihtuahsak niin, camp hrang hrangah dan lam inzirtirna legal awareness campaign kalpui mek a ni.
Raltlan lo thleng tharte hi COVID-19 hri an kai leh kai loh endik hmasak zel niin, hri kai 298 hmuh chhuah tawh niin, thihpui mi 1 a awm a, mi 14-in hri an vei mek . COVID-19 vaccine la theite chu pek zel niin, dose khat la mi 1,553 leh dose hnih la kim tawh mi 336 an awm a. An chet vel dan uluk taka vil a nih theih nan ID card pe vek tura ruahman a ni a, tunah hian ID Card 98 siam tawh a ni.