He hunah hian District Administration official-te, DIPRO leh, CYLA leh MJA Lawngtlai District hruaitute pawh an tel a. khawpui chhunga ATM khawl indaih loh avang leh khawl chhia a awm fo avanga mipuiin harsatna an tawh thin dan te sawi niin, Bank hrang hrangte'n an ATM khawl dinhmun leh harsatna an tawh thin te an sawi a. Khawl awm sain mipui a chawm zo tawh lo deuhva a lan avangin a dang dah belh a nih theih nana hma lak te, power supply su-in khawl a tihchhiat thin chin fel dan tur te, mipuiin a hman dan an thiam loh avanga khawl chhia awm thin ven nana mipuia zau zawka ATM hman dan zirtirna vawrh darh te leh hmasawnna tur kawng hrang hrangte sawi ho leh rel a ni.
Tun dinhmunah Lawngtlai khawpui chhungah State Bank of India , Mizoram Cooperative Apex Bank , Canara Bank leh HDFC te'n ATM pakhat theuh an nei mek a. SBI Lawngtlaia ATM khawl hi January ni 29, 2022 atang khan a card reader a chhiat avangin a hman theih rih loh va, tun kar Zirtawpni, velah hi chuan siam that theih beisei a ni a. Bank dang ATM erawh chu tun dinhmunah hman theihin a tha vek thung. SBI bikah Green Channel Counter Machine hmanga mahnia awlsam taka pawisa lak chhuah theihna pathum a awm mek thu tar lan niin, mipuite’n hman tangkai nachang hria se, ATM indaih lohna chu nasa taka a chhawk theih an beisei thu SBI hotute chuan an sawi a ni.
Bank lamin harsatna an tawh thin an tar lan zingah customer-te'n card an rawlh luh dan a dik loh avang leh a hun hmaa an phawi thin avanga khawl chhia chu harsatna tam ber a ni a. Khawl a chhiatin, hmunpui lam atanga a siamtu tur mi thiam chah chhuah a tul thin avangin hun a duh rei a. Customer-te'n ATM booth-a khawl hman dan kaihhruainate chhiar nachang an hriat a, fimkhur taka ATM an hman thin a pawimawhzia he hunah hian tar lan a ni.