Nimin khan Lawngtlai DC Conference Hall-ah Lawngtlaia ei leh in siam leh zuartute tan ei leh in thianghlim leh himna (food safety) chungchang zir hona buatsaih a ni.
Khuallian Lawngtlai DC, Dr Andrew H. Vanlaldika chuan mihringin tha taka hna thawk turin hriselna tha a mamawh a, chumi tur chuan ei in thianghlim leh tha a pawimawh tih a sawi a. Mihring hriselna leh nunna thlenga nghawng thei a nih avangin ei leh inah fimkhur a, thianghlim taka chet a tul a ni tiin, ei siam leh zuar kal khawmte chu food safety ngai pawimawh turin a chah a ni.
Aizawl atanga Food Safety Team lo kalten Mobile Food Testing Laboratory rawn kengin, restaurant, chawhmeh bazar leh buhfai kudam-ah te food sample an endik nghal.
Food Safety and Standards Act, 2006 hi India ramah mihring tana ei leh in tur tha, natna hrik laka him leh chakna pai siam chhuah leh mipui hnena pek a nih theih nana dan siam niin, August ni 5, 2011 atanga hman tan a ni a. He dan hnuaiah hian ei tur siamna, vawn thatna leh zawrhna hmun chhinchhiah (registration & licence) te, ei tur siam chhuah leh zawrhte a that leh that loh enfiah te kalpui thin a ni.
India rama ei leh in siam chhuaktu, chaw luttu leh chhawp chhuaktu zawng zawng te chuan Food Safety and Standards Authority of India atangin phalna an nei hmasa vek tur a ni a. Dan bawhchhia an awm chuan man a, hrem leh an thil siam tihchhiat theih a ni.