LADC, Chief Executive Member turin, Pu V.Zirsanga lakluh ani.

     Nimin khan Lai Autonomous District Council a Chief Executive Member atan Paithar bialtu MDC, Pu V.Zisanga chu lakluh a ni.

Kumin August 26 a LADC Sorkar dinglai Executive Committee paihthlak niin, Governor in CEM atan MNF Member Pu V.Zirsanga a pawmpuina, tunkar Thawhtanni a tihchhuah a nih hnu ah, nimin khan Lawngtlai DC, Dr Andrew H.Vanlaldika chuan LADC a CEM atan Pu V.Zirsanga chu rinawmna thu tiamtirin a lalut.

LADC Hall a CEM lakluhna, LADC a Executive Secretary Pu H.Lalramenga kaihhruaiah, CEM thar chuan, LADC ah MNF Legislature Party Sorkar chuan , ram mipui huapzo dintura theihtawp a chhuahtur thu sawiin, MDC te, Political Party, Tlawmngaipawl leh LADC hnuaia thawktute leh ram mipuite chu Sorkar finchhuah a ngaihna ah thurawn pehrehlo turin a ngen.

Pu V.Zirsanga chuan Sorkar insiamremna tur ah ngaihdan leh duhdan inanglo te  awm mahsela, MNF Legislature Party chhungkuaah boruak thalo a awmlo tih sawiin, Lairam tan theihtawp an chhuahzel tur thu sawiin, MNF Gen Hqr President Chief Minister ni bawk Pu Zoramthanga leh a thawhpuite chungah te, MNF District Hqrs Lawngtlai hruaitute chungah te Sorkar dinna tura hma an lakna ah lawmthu a sawi.

CEM a lakluh a nih hnu ah The Lawngtlai Post zawhna chhangin Pu V.Zirsanga chuan,  Executive Member turte puanzar thuai a tum thu leh, Sorkar chu fukekima a kalthuai theih nan hmalak nghal a tum thu a sawi.