Thingphun beihpui thlakna ni Green Mizoram Day ah, vawiin khan Lawngtlai a Sorkar Department hrang hrang leh MJA Lawngtlai District te chuan Lawngtlai leh Mampui inkar kawngpui kam ah Thingtiak 283 phunin, thatakin an hung nghal.
Green Mizoram Day ah hian DC, Dr Andrew H.Vanlaldika bakah Lai Autonomous District Council a Executive Member Environment, Forest & Climate Change enkawltu Pu CL Lianzuala te pawn thing tiak hi an phun a, vawiin a thingtiak phunte hi Distict Level Green Mizoram Committee chuan a enkawlzui dawn a ni.
Lawngtlai leh Mampui inkar kawng kam ah hian tun dinhmunah chuan Thingtiak phunna tur remchang a awm tawh lova, phuntawhsa thataka enkawlzui lam ah nasa zawka tanlak a nihtur thu Lawngtlai DC chuan a sawi.
Hrileng vangin Green Mizoram Day ah hian a hranin hun hman a nilova, Department hrang hrang ten an thingphunna tur hmun pan nghalin hri laka invenna thataka zawm chungin thing tiak hi an phun.
Kum 2020-2021 chhung a Lawngtlai District ah Kangmei vengtha ber ah Siachangkawn thlan niin Pahnihna ah South Lungpher Pathumna ah Paithar khua thlan a ni a, Lawmman pakhat hian Rs.50,000/- Pahnihna in Rs.30,000/- Pathumna in Rs.20,000/- an dawng dawn a, lawmman hi a remchandan angin hlan a ni dawn a ni.
Tags
News