Kum 2020 chhunga LADC hnuaia hna hrang hrang lak danah thil fel tawklo a awm ni a sawi a awm avangin chhuichianga thla hnih chhunga sorkara report thehlut tura din, Study Committee on Appointment of Staff under LADC-2020 chuan nimin khan Pu Manghmunga Chinzah, CEM hnenah report an thehlut.
Pu H. Lalmuansanga, Adviser to CEM kaihhruai, he Study Committee-ah hian Pu L.Z.Tluanga, Deputy Secretary (GAD) chu Member Secretary niin member dang, Senior Officers 4 an awm a. Kum 2020 chhunga LADC hnuaia hna hrang hrang lakdan ah Dan bawhchhiatna a awm leh awm loh chhuiin sorkarah report an pe ani.
Pu Manghmunga Chinzah, CEM chuan, he Study Committee hi politics kaihhnawiha din a nilo tih sawiin, Dan bawhchhiaa thiltih a awm leh awm loh enfiaha siamthat ngai alo awm a nih chuan dan chhungah siamthat tum anih thu a sawi a. Politics thil avanga he thil hi kalpui ni lovin, LADC Sorkar zahawmna tur leh ram mipui, a biktakin zirlaite hmakhua ngaih avanga hna lak dante felfai zawka kalpui a tul tawh avanga enfiah hna hi thawh a nih zawk thu tarlangin dan anga hnaa lutte tan engmah hlauhthawn tur a awm loh thu leh, he report hi Executive Committee-in nguntakin a thlir zui dawn tih a tarlang ani.
Report phek 22-a chhah hi, Study Committee aiawhin, Pu H.Lalmuansanga, Convener-in CEM hi a hlan ani.
Tags
News