Nimin khan Pu Manghmunga Chinzah, CEM chuan LADC Executive Secretariat chhunga Department hrang hrang te tlawhin an hnathawh leh hmalakna hrang hrangte a thlirpui
CEM chuan, LADC hnuaia Department 35 zingah te deuh leh lian deuh awm mahse, Department te chu an an pawimawh vek a. Department thenkhat inthlahdah avangin LADC Sorkar a lang mawilo thei tih hria a, mahni zawnah theihtawpchhuaha ram leh hnam tana thawk theuh turin, LADC hnuaia Department hrang hranga thawktute chahin sorkar hnathawk zingah politic vang emaw chhungkhat laina hnai nih vang emaw a induhsakna hleihluak a awm dawn lova, hnathawk tha leh sorkar tana rintlak apiang duhsak an ni mai dawn tih a sawi.
Tunhnaiah Department hrang hranga thawktute pawh a theih ang anga semrual chhoh mek zel a ni a, eng Department mah ngaihthaha thlauhthlak bik an awm dawn lova, a tul angin an semrual zel dawn a, Department hrang hrang hnathawh leh hmalaknate chu a enkawltu Executive Member-te kaltlangin a
thlirpui reng dawn ati bawk.
CEM chuan, Chief Minister Pu Zoramthanga kaihhruai Mizoram sorkar-in LADC sorkar a duhsak hle tih sawiin, hripui leng avanga ram sum leh pai dinhmun a chhiat viau lai pawhin theih ang angin sum leh pai an rawn pe zel tih sawiin Mizoram Sorkar chungah lawmthu a sawi.
LADC hnuaia thawktute chu, Central leh State Sorkar duhsak tlaka, rintlak taka mahni hna theuh thawk a, hmasawnna hnathawh hlamzuih awmlo tura theihtawp chhuah turin a chah bawk.
LADC hian Department 35 enkawlin thawktu, Elementary School Teacher-te tiamin mi 2000 chuang a nei a. Executive Secretariat hi Lawngtlaiah awmin, Sub-Hqrs Bualpui (Ng) bakah Divisional Office 6 a nei mek ani.
CEM hi Executive Member thenkhat leh Pu H.Lalramenga Executive Secretary bakah Pu LZ.Tluanga, Dy.Secretary LADC leh Official engemawzatin an tawiawm ani.