Myanmar ram Sipai thuneihna paihthlak tum a beihna chuan khawvel a luah hneh viau a, Lawngtlai District MJA te pawn, mipui tawrhna thleng pawi an tih thu leh, Chanchinbumite rahbeh an ni chu an dem thu tunhnai mai ah an sawi a nih kha.
Tharum tellovin mipuiin bei mahse, khawilai ah emaw chuan innawrna erawh a thleng deuh reng lothei lova, thlakhat chuang nitin khawpui hrang hrang ah kawng zawh an awm reng a, an ram tana an beihna hi entawn tlak a tlingin a hriat.
Mizoram a ni emaw, Lawngtlai District leh LADC a ni emaw, a khua leh veng mal ang a ni emaw, thil nihdantur anga a kalloh a, siamthat duhna lantirna ah, tihtak taka beihna a pawimawh a, chu chu ram leh hnam, khua leh veng hmangaihna tak tak thinlung atang lo chuan tihhleihtheih a nihloh chang a tam in a rinawm.
Myanmar ram a thalai, mipui ten Sorkar paihthlak tum a an beihna ang hian, kawngte zawhin, i tive chiam ang u, tihlam a nilova, ram leh hnam hmangaih a, an hmalam hun atan tanrualna thatak an nei hi a hlu a, chulai tak chu entawn tlak an nihlai pawh a ni.
Sorkar nawrna a ni emaw, khawtlang leh ram tana hmalakna a ni emaw, hnam thinlung atanga hmalakna hian tha a tichak a, tute emaw tihtur a dahtlatna hian hmalam panna kawng a tiping fo thin.
Kawngkam a leivung paih ngawt te hian hnam rilru chu sawiloh, an mihringpuite ngei pawh zahna an neilo tih a chiang a, kawng hrang hrangin Myanmar in an zalenna atana an beihna, huaisenna an neih phahna ang, ram hmangaihna hi, hmalam panna kawng ah neih atan a tha viau ang.