Ram thenawm Myanmar-in politics avanga buaina an hmachhawn mekah Lawngtlai District chu Myanmar ramri hrula awm a nih vangin Myanmar atanga raltlan dawng thei dinhmunah a ding mek a. Myanmar atanga raltlan lo dawnsawn dan tur chungchangah Mizoram sawrkar chuan ni 27.02.2021 khan inkaihhruaina felfai tak tichhuakin, hemi zulzui hian Myanmar atanga raltlante felfai taka lo dawnsawn leh enkawl an nih theih nan Lawngtlai DC, Dr Andrew H. Vanlaldika chuan nimin March 6 khan Lawngtlai District chhunga village council zawng zawng zawm tur inkaihhruaina a tichhuak.
1. Politics thil avanga Myanmar mi Lawngtlai District, Mizorama raltlan lo lutte chu an lo luhna khaw hmasa bera VC leh NGO te'n an lo finfiah tur a ni a. Finfiahna tur form hi bialtu BDO emaw, DC office-ah emaw dil/lak theih a ni ang.
2. Politics emaw, pawl thil emawa an inhnamhnawih avanga an nunna derthawngte chauh raltlana chhiar an ni ang.
3. Raltlante hi an hriselna leh COVID-19 hri an kai leh kai loh test/endik tur a ni ang.
4. Raltlante chu "The Mizoram Relief & Rehabilitation (of Refugees/Internally Displaced Persons) Scheme, 2018"-in a sawi angin lo tuamhlawm/chhawmdawl tur a ni ang.
5. Raltlante hi felfai takin register-ah chhinchhiah an ni ang a, anmahni nihna tichiang thei turin DC office atangin Identity Card siamsak an ni ang.
6. Raltlante hi an awmna khua pelin khaw dangah emaw, District dang leh State dangah emaw an kalsawn/chetsawn phal a ni lo va. Medical thil avanga an awmna hmun chhuahsan ngai/tulte chu Chief Medical Officer-in lehkha a siamsak hnuah Deputy Commissioner-in movement permit a pe chhuak ang a, chumi hnuah chauh an awmna chhuahsan phalsak an ni ang.
7. Politics thila buaina avanga Myanmar atanga raltlan lo lut an awm chuan a rang thei ang berin VC-te'n anmahni bialtu BDO hnenah emaw, DC office, Lawngtlaiah emaw hriattir nghal tur a ni.