Nimin March ni 8 kha International Women's Day a ni a. Lawngtlaiah chuan One Stop Centre leh DAY-NULM tang kawp huaihawtin DC Conference Hall-ah Lawngtlai DC, Dr Andrew H. Vanlaldika hovin hman a ni.
Dr Andrew H. Vanlaldika chuan tun hmain khawvel hmun hrang hrangah hmeichhiate chu dinhmun chhia leh hnuaihnung zawka ngaihna a awm thin a, hnam thenkhatah phei chuan bungraw chi khat ang leka ngaihna te pawh a awm thin tih sawiin, hmeichhe huaisente avangin tun ah chuan hmeichhe dinhmun chuan hma a sawn tawh hle a, Mizoram ngei pawh thlirin, mipa tam takin an tluk loh hmeichhe ngaihsanawm leh entawn tlak tam tak an awm tih sawiin, kawng tam takah hmeichhiate chuan chungnung zawk leh hmahruaitu nihna pawh an nei tawh a ni, a ti. Hmeichhiate chuan hnam leh khawtlang tihdanphung kalh si lova hna leh khawtlang nuna hmasawn dan an thiam a pawimawh thu sawiin, chet velna hrang hrangah hmeichhiate'n thil ho tham te pawh mipa tih tura dah kan ngah lutuk chuan, rilru lamah mipa tluk lova inhriatna a bo thei dawn lo va, mipa tih theih ang chu tih theih ve tum tlat turin rilru tihpaukhauh a tul a ni, a ti.
He hun hi Lawngtlai DC office-a Superintendent Pi Malsawmtluangi'n a kaihruai a. One Stop Centre-a Administrator Pi J. Lal remkimi; hmeichhe chenna in nei lote tana khawsakna siamsaktu, Swadhar Greh-a Superintendent Pi Rebek Laldawmdingi, Mahila Shakti Kendra-a District Coordinator Pi B. Lalruatchhungi leh DAY-NULM District Manager Pi VL Ramnunsangi te bakah,LWA General Hqrs Lawngtlai leh MHIP Sub-Hqrs Lawngtlai ai awhte hnen atangin thu sawi ngaihthlak a ni