MA KYAL SIN
A kawr hmaah thuziak thiltithei tak mai, 'Everything will be Ok!' tih hi a chuang vah mai a, hei hian Myanmar buaina chhumpui zing chu a la kiang ang, a la pangngai vek ang, hun rei lo te-ah a tihna ni ber hian ka hria a...
—LH.Hauhêng, Nghilhloh Rûn
March 3, 2021 (Nilaini) khan kum 19 mi chauh, hmeichhe pakhat awmnem leh hriam hrei tel hauh lo va, a ram leh hnam tana a nunna hlu tak mai hlan tu, Ma Kyal Sin (Angeli tia koh leh hriatlar zawk zaw mah) chanchin hian min rawn deng dawt mai a, ka ngaisang hle.
He nula, Myanmar/Burmese nu ngat chhulchhuak fanu mal ni ngeia mawi, kungfu master nia sawi hian, a tuk chhuak tur chu a pa hnenah, hetiang thuchah ropui hi a sawi a, ''Ka pa, ka lo haw tlai dawn a nia aw!" ti ngat in thu a dah a.
Tin, thuziak a awrhah chuan, ''Ka lo hliam palh a nih chuan ral ṭitna hmunah min chhan tum in, ka taksa chhanhim tumin rawn buaipui suh u aw. Ka Blood group chu B+ a ni e. Ka taksa khawi lai pawh hlep thla ula, A mamawhtu tan ka pe e!'' tih thu hi a lo inziak kalh mai a. Fahrin manhla a va ni chiang em ve aw...
A ram mipuiin Democracy rorelna an neihlet leh theih nan zâm miah lo leh hlim takin a bei a, a sual a, a do tlat a, an zalênna ni kawl êng tur nghakhlel taka thlirin a sakruang a ram leh hnam tan, sipaite kut tuarin a thi ta zawk kha a ni a. A va ngaihsan awm em; a thi nangin a thisen he leilungah hian a luangral dawn lo tih hi a chiang hle mai.
Social media ah a thih thawm hre tawh phawt chuan, an status leh wall a luah khat nghal vek a, engkar lovah he chanchin hi khawvel hriatah pholan a ni. Chuta an an thuziak ka nun khawih dawt tute chu, 'Everything will be Ok! Keep on fighting for freedom & justice, tih te, Brave heart Ma Kyal Sin, the bright star of myanmar, tih te, 'Angel's sacrifice will not go in vain, salute to this brave girl' tih te a tam khawp mai a. Tin, mahni ram leh hnam tana nunna hlan ngam te hi ka mi ngaihsan ber te an ni a, doral hmelma lian hrang mek kara huaisenna dika huaisen ngam te hi khawvel hian a chhinchhiah a, a hre reng tawh dawn a, hetiang hmeichhia hi kan ram nuhote hian hring zel se, a va duhawm dawn em.
He kan sawi mek, hmeichhia hi kum 19 mi chauh a ni a. Kum 19 mi hian a ram leh hnam hi a lo va hmangaih em, a ram leh hnam tan hian a va inseng nasa em, a man hi a to hle ang. Nula hlim leh lawm thei tak, sawi zui hlawh leh mak tih, lainatna ngah tak mai, harsatna an ramin an tawk a, democracy ram nawmzia leh hlutzia a hria a, a kawr dum hma ah "Engkim a la ṭha leh vek mai ang!" tih inziahna kawr a ha a, chumai niloin a chhe ber a thlen thut pawha a enkawl a awlsam zawk nan, a blood group chuanna card a awrh a, a taksa peng hrang hrangte pawh ama'mawhtute hnenah phal takin a hlan nghal vek a, amah a inpeih a, a ram leh hnam erawh democracy rorelna tluantling nih hlan a nghakhlel em em a, ram zalên annih theihna tura Mandalay, Myanmar hmuna kawng zawha fehchhuak chu, an mahni âwptu sipaiten a lu a kap in, a mit men laiin zalênna hmu thei dawn lo mah se, lei rem an ramin an lo rah a, inremna tluantling democracy an lo neih a, zalênna famkim an lo hmuh theihnan a ni zawng lei daiah a saruak zalh a ni ta a ni.
Hnukulh ṭeuhvin Myanmar lama kan unaute buaina, zalênna famkim nei ve tura an beihna, rilṭam leh tuihal pawh sawi hleithei lova a pui a pang, a lian a te thlenga ke an penna chuan rah duhawm tunah la chhuah rih lo mah se, an ti tawh a, an bei tawh a, an sual tawh a, an hneh em em ang tih hi a rinawm tlat a ni. I ṭawngṭaipui mawlh mawlh ang u.
Tihian han tlip dawn teh ang, a kawr (T.Shirt dum hak) hma-ah thuziak thiltithei tak mai a chuang váng mai a, chuta thu inziak chu 'Everything will be Ok!' tih hi a ni a, hei hian Myanmar buaina chhumpui zing chu a la kiang ang, a la pangngai vek ang, hun rei lo te-ah a tihna tluk ni ber hian ka hria a...
(He thuziak hi, Ma Kyal Sin (Angeli), kum 19 mi, a ram leh hnam ina zalênna a lo hmuh theih nana beitu, sipai kut tuara boralta ka sûnna thuziak liau liau lo ni se.)