Lawngtlai District chhungah COVID-19 hri kai hmuh chhuah belh zel a nih avang leh mipui him nan leh hnuichhui bakah hri kai leh kai lo endik hna chak zawk a kalpui a nih theih nan te Lawngtlai -ah inkharkhip puan a ni.
Lawngtlai DC, District Level Task Force Chairman ni bawk Dr Andrew H. Vanlaldika chuan Disaster Management Act, 2005 tlawh chhanin Lawngtlai khawpui huam chhungah naktuk Thawhtanni December ni 7 chhunlai dar 12:00 atanga Thawhlehni) zan dar 11:59 thleng partial lockdown a puang a. Partial lockdown puan chhunga zawm tur inkaihhruaina a chhuah nghal bawk. Inkaihhruainaah chuan Lawngtlai khawpui chhunga pawn lam atanga khualzin cham mek, mahni khaw lama haw duh turte chuan Thawhtanni chhun dar 12:00 hmain Lawngtlai khawpui chhuahsan theih a ni ang a. Hemi chhunga chhuak lote chu Partial Lockdown puan chhungin an veivah phalsak an ni tawh lo vang. Pawn lam atanga Partial Lockdown puanna chhunga luh leh chhuah khap a ni a. Hei hian Home Department-in Mizoram luh phalna a pek te, Mizoram pawna chhuak tur te, damlohna leh chhiat tawh thila chhungkhat hnai zual te veivahna a huam lo vang. Heng ngaihhnathiam turte hian Sawrkar-in phalna a pek emaw, VLTF lehkha emaw an nei ngei tur a ni ang.