Dec 4 a Lai Autonomous District Council Inthlanpui neih a vote thlakna hmanrua te chu himtakin Lawngtlai thlenpui vek a ni tawh a, inthlanpui neih tawh a felfai leh a muanawm ber tum niin a hriat
LADC a Sorkar thar dintur a mipuiten tluang taka nimin lam a vote an thlak hnu ah, inthlanna buaipuitute chuan vote thlaknan a hman, EVM te chu Lawngtlai DC Office an panpui nghal a, Polling Station 111 a EVM te chu Inrinni zing dar 5 khan DC Office thlenkim pui niin, December ni 8 a vote chhiar hma zawng chu venhimna khauhtak hnuai ah Strong room ah dah that mek a ni.
TuntumLADC Inthlanpui neih ah khan a pumpui vote nei 51,456 ah vote 43,060 a tla a, heibak ah hian Postal ballot a vote tla 802 a awm tawh a, Postal ballot hmanga vote thlak dil hi 851 awmin mi 49 te Postal ballot chu ngaihchan mek a ni a, tihian inthlanpui neih ah khan vote tla hi 85.24% a ni.
Postal ballot tellovin, Vote tlak thatna ber Polling Station - chu Chamdur P-II niin 98.36% a tla a, Vote tlak chhiatna ber Polling Station chu Paithar niin 65.46% vote a tla.
Vote tlak thatna ber Constituency chu Vote 93.82% tlakna Sakeilui MDC Constituency niin Vote tlak chhiatna ber Constituency chu -Lawngtlai-III MDC Constituency niin 72.48% a tla.
Tuntum inthlanpui neih kha Central Young Lai Association President, Pu HC Vanlalruatpuia chuan inthlanpui neih tawh zawng zawng ah, a muanawmber bak ah, a felfai ber tum ni a a hriat thu The Lawngtlai Post a hrilh a, YLA leh Sorkar in thawhhona thatak hnuai a, hrileng kar ah inthlanna felfai tak neitur a hma an lakna ah BRanch YLA leh VLTF te tanlakna vang a nih thu sawiin, Central YLA chuan lawmawm an tih thu a sawi.