Nimin (Zirtawpni) khan Lawngtlai East bialtu MLA, Agriculture Development Board Vice Chairman ni bawk Pu H. Biakzaua chuan Land Resources, Soil & Water Conservation Department hnuaia Lawngtlai District chhunga Sihtlangpui khua leh Chawntlangpui khuaa thelret (rubber) chingtute hman tur, thelret sawngbawlna khawl, 'rubber rolling machine' leh a kaihhnawih hmanraw dang Department-in subsidy kal tlanga an ruahman chu a hlan a. Thelret chingtute hnena pek chhawn tur he'ng bungraw phurtu lirtheite hi MLA hian a vailiam nghal.
Khawl sem puala inkhawm tawi buatsaihah Pu H. Biakzaua chuan, Land Resources, Soil & Water Conservation Department hma lakna a Lawngtlai District chhunga kut hna thawktu eng emaw zatin thelret hmun an siam leh tun dinhmuna kung 2000 chuang hnai tur a awm thei chu lawmawm a tih thu a sawi a. Thelret sawngbawl chu thiam ngai tak a nih avangin department-in kut hna thawktute a zirtir bakah, a sawngbawlna khawl nen lam a ngaihtuahsak chu lawmawm a tih thu a sawi a Pu H. Biakzaua chuan thelret hmun siam chu chhungkaw inchawmna tling a ni a, kum 25 chhung hlawk taka hnai theih a nih avangin kut hna thawktute paw'n intihhmuh chi tak a ni, a ti.
He hun, Land Resources, Soil & Water Conservation Department Lawngtlai District Officer Pu PT Vanrosiama kaihhruaiah hian LADC-a MDC eng emaw zat bakah, line department official leh thelret chingtute an tel a. thelret chingtute ai awhin Pu H. Lalramnghaka, Sihtlangpui chuan thu a sawi a. Soil Conservation Demonstrator Pu H. Liankima'n khawl hman dan leh thelret hnai dan a sawi fiah a ni.
Thelret sawngbawlna khawl leh hmanraw dangte hi Sihtlangpui leh Chawntlangpuiah pakhat ve ve pek chhuah niin, beneficiary-te'n Rs 10,000/-in an do let ve a. Nimina sem chhuahah hian Sihtlangpuia LRS&WC Smoked House-a dah tur khawl pakhat a tel bawk.
Tags
News