Lawngtlaiah Hrikai an pungchho zel a, Hrikaite enkawlna Covid Care Centre chu Chawnhu rama Eklavya Model Residential School sak mek ah sawn ani.
Lawngtlai District chhunga Covid 19 Positive te hi District Hospital building sak tharah enkawl thin an ni a, hetah hian Khum 50 leng tura ruahman anih laiin, Positive an pun chhoh vangte, Hospital Building thar hi Damlo dang enkawlnan mamawhna a san tawh vangin Chawnhu ram a Eklavya Model Residential School sak mek ah November 21 atang khan sawn tan ani.
CCC thar hi, damlo 200 dah theihna tur a ngaih a ni a, Sorkar lam chuan a nihtur angin a theih angt angin an cheibawl chho mek a, hmanrua mamawh tur ang te chu Central YLA leh Branch YLA hrang hrang ten an ngaihtuah a, mimal inphal te thawhkhawm a awm nual bawk
Lawngtlaiah hian tun hnaite ah Hri kai hmuhchhuah an awm chho deuh reng a, niminpiah khan Positive 22 hmuh chhuah thar an ni a, heng hmuh tharte hi Positive Contact, RAgT hmanga mi 230 endik atanga hmuh chhuah te an ni a, nimin lamah mi 200 chuang test tura ruahman niin, Sorkar in Official in hrikai an hmuhchhuah hi chanchin buatsaih lai hian la puang lo mahse, hmuhbelh erawh an nei tih erawh hriat a ni.
Sorkar thuchhuahin a tarlandanin nimin tlai dar 5 thleng khan COVID-19 hri leng laka fimkhur thila government quarantine facility leh home quarantine-a khung hran mek leh COVID-19 positive enkawl mek zat chu mi 199 a ni a. An zinga mi 94 chu Posiotve mi 70 telin facility quarantine niin, mi 105 chu home quarantine an ni.