Nimin khan Lawngtlai District Level Task Force on COVID-19 leh quarantine facility nodal officer-te leh zonal officer-te chu DLTF Chairman, Lawngtlai DC, Dr Andrew H. Vanlaldika hovin DC Conference Hall-ah an thu khawm.
DC chuan Lawngtlai District-ah vantlang zinga COVID-19 hri kai hmuh chhuah an nih tak avangin tan lak zual a tul hle tih a sawi a. Sawrkar leh VLTF leh tlawmngai pawlte chu tang rual a, inthlahdah lova hma lak ho zel a pawimawh a ni a ti a. COVID-19 laka him turin mi tinin mahni mawhphurhna hriat chian a tul thu sawi.
He thut khawmah hian Lawngtlai District-a 'No Tolerance Fortnight' hman mekah mipuite thlawpna a that thu tar lan a ni a. Kohhran leh pawl dangte paw'n sawrkar an ngaichang thiam leh thu awih taka dan an zawm thin chu member-te'n lawmawm an tih thu an sawi a. Hri leng darh zel tur dan chahna kawngah a tam thei ang ber inbiak pawh leh inrawn tlan a pawimawh thu sawi lan a ni.
Dawr leh pun khawmna hmun danga hming ziah thin chu hri leng darh zel tur venna leh chhui chhuahna (contact tracing) atan thil pawimawh tak a nih avangin mipuite pawhin tha taka zawm turin DLTF chuan a ngen ani.