ADC te thilphut a hlawhtlin theih nan theihtawpin Tribal Affairs Minister in hmalak a tum

           Tribal Affairs Minister  Pu Arjun Munda chuan  Mizoram a Autonomous District Council ten inrelbawlna leh sum leh pai an hmuhdan  ah dinhmun sang zawk an neihtheih nan Central Sorkar chuan theihtawp chhuah in hma alak thu a sawi.

      Tribal Affairs Minister hian nimin khan Lawngtlai tlawhin, LADC a CEM Pu T.Zakunga leh MDC dang pasarih, tunhnai a BJP zawmtute Central YLA Hall ah BJP ah a lawmlut a, Union Minister chuan Mizoram a Autonomous District Council pathum ten inrelbawlna bak ah Central atanga State kaltlang lova pawisa an hmuh theihna tur Direct Finance  an hmuhtheih nan a  ram danpui, Sixth Schedule siamthat an duhna chu  Central Sorkar chuan a hlawhtlin theih nan theihtawp a chhuah mek tih sawiin, reilote ah tihfel a beisei thu a sawi a, Autonomous District Council pathum te thil phut chu ram hmasawnna tur a nih vangin Sorkar chuan a ngaipawimawh a, BJP hruaitu dang  Raj Nath Singh leh Amit Shah te pawn an lo tiam tawh a ni a,  Autonomous District Council ten dinhmun thar an chuankai lawm tur a Lawngtlai tlawh thuai a tum thu a sawi 

                MP Lok Sabha, BJP National General Secretary, Pu Dilip Saikia pawhin in thu sawiin, Hmarchhak a District Council dangte pawh dinhmun sangzawk ah hlankai an ni a, Mizoram a Autonomous District Council te ngenna chu tihhlawhtlin theihloh tur a awmloh thu a sawi.

                LADC a Chief Executive Member, Pu T.Zakunga chuan BJP an zawmchhan sawiin, District Council ten awmze nei zawk a thuneihna an neih theih chu an duhber a nih vangin, chu hmun hruaithlengtur chu BJP an ni tih an rin tlat vang a LADC ah pawh BJP Sorkar din an nih thu a sawi.